ଦୀପାବଳୀ ସ୍ମୁତି

ଆଲୋକର ପର୍ବ ଅଟେ ଦୀପାବଳୀ

କି କହିବି ସଖି ଆଜି

ବାଳୁତ ବେଳରେ ଦୀପ ଗଢୁଥିଲେ

ଆମ କୁନି ହାତେ ମଜ୍ଜି ||

ଘରୁ ଛପି ଆମେ ମାଟି ଆଣୁଥିଲେ

ମାଟି ଗାଡିଆକୁ ଯାଇ

ଲୁଚି ଛପି ଆମେ ଦୀପ ଗଢୁଥିଲେ

ଭାଙ୍ଗିଦେବ କାଳେ କେହି ||

ଚିଲିକ,ହୁଙ୍କା ମାଟି ହାତେ ଚକଟି

ମାଟି ଗୋଲା କରୁଥିଲେ

ନା ନା ପ୍ରକାର ରୂପ ଆକାର ଦେଇ

ଦୀପ ଆମେ ଗଢୁଥିଲେ ||

ତୋ ଦୀପ ଆକାର ମୋ ଦୀପ ଆକାର

ହୁଏନି କେବେ ସମାନ

ତୋର ଗୋଲ ହେଲେ ମୋର ଲମ୍ବାଳିଆ

ରୂପ ରଖ ଥିଲା ଭିନ୍ନ ||

ଅଦଳ ବଦଳ କରୁ ଥିଲେ ଆମେ

ମନରେ ଥିଲା ଆନନ୍ଦ

ଦେଣନେଣ କରି ଖୁସି ହେଉଥିଲେ

ହସୁଥିଲେ ମନ୍ଦମନ୍ଦ ||

ଖରାରେ ଶୁଖାଇ ତାକୁ ଟାଣ କରି

ଆଳୟ କୁ ଆଣୁଥିଲେ

ମଆ ଯେବେ କହେ ରାନ୍ଧଣା ସରିଲା

ଅଙ୍ଗାରରେ ପୋଡୁଥିଲେ ||

କୋଉ ଦୀପ ଲାଲ୍ କୋଉ ଦୀପ କଳା

କିଏ ମିଶାମିଶି ଥିଲା

ନିଜେ ଗଢି ଯେଉଁ ଆନନ୍ଦ ମିଳଇ

କିଣାରେ ଥାଏ କି ଭଲା ||

କେଉଁ ଦୀପେ ଘିଅ,କେଉଁ ଦୀପେ ତେଲ

କେଉଁଠି ଦେଉ ମୋବିଲି

ସଳିତା ବଳିକି ତାହାକୁ ସଜାଉ

ଯିବ ନଭ ତାରା ବଳି ||

କାଉଁରିଆ ଜାଳି ବଡବଡୁଆଙ୍କୁ

ଆମେ ତ ବାଟେଇ ଥାଉ

ଅନ୍ଧାରରେ ଆସି ଆଲୁଅରେ ଯାଅ

ଏହି କଥା କହିଥାଉ ||

ଯୁଗେ ଯୁଗେ ଏହା ହୁଏ ପ୍ରଚଳିତ

ବର୍ତ୍ତମାନ ଚଳୁଅଛି

ପିତୃପୁରୁଷଙ୍କ ପିଣ୍ଡ ଦାନ ଦେବା

ସଂସ୍କୃତି ଆମ କହୁଛି ||

ଚାଲ ସଖି ଆଜି ଅତି ଅନନ୍ଦରେ

ଶୁଭ ଦୀପାଳୀ ପାଳିବା

ଦୀପ ଗଢିବାକୁ ମାଟି,ଚୁଲି ନାହିଁ

ବଜାରୁ ନେଇ ଆସିବା ||

ଅନ୍ଧାର ଉପରେ ଆଲୋକ ବିଜୟ

ଦୀପାବଳୀ ସୂଚାଉଛି

ଭାଇଚାରା ଆମ ବନ୍ଧୁତା ସଂପର୍କ

ବଜାୟ ହୋଇରହିଛି ||

ସୁଶ୍ରୀ ସାହୁ

ଶିଲଂଗ

ମେଘାଳୟ