ବସନ୍ତ ଆସିଲା
ବସନ୍ତ ଆସିଲା
ବସନ୍ତ ଆସିଲା,
ଆନନ୍ଦରେ ପୁଲ୍ଲକିତ,
ହରଷିତ ଉପବନ,
ପବନର ଝୁଲାରେ ଝୁଲି,
ଏକ ଆରେକର କାନେ
ଚୁପି ଚୁପି କହିଦେଲା,
ହେ ଜାଣିଛ, ବସନ୍ତ ଆସିଲା !
ଏଇ ଦେଖ ନାଲି ନାଲି
ଗୁଜୁରୀ ଆସୁଛି ନବ କିଶଳୟ,
ପ୍ରତି ଡାଳେ ଡାଳେ କେତେ ଫୁଲ କଢି
ଆକାଶରେ ଚମକକ୍ ତାରା ପରି ।
ଟିକେ ଚୁପ୍ ରୁହ, ଆଉ ଅନୁଭବ କର,
ମଳୟର ମୃଦୁ ମୃଦୁ ପରଶକୁ
ପବନର ଉଷ୍ମତାର ।
ଆଉ ଦିନ କେଇଟାରେ,
ଶୀତ ଚାଲିଯିବ ତାର ଆପଣା ବାଟରେ,
ବସନ୍ତ ଆସିବ, ଖେଳିଯିବ ନବ ଉନ୍ମାଦନା
ବୃକ୍ଷରେ ବୃକ୍ଷରେ, ଲତା ଆଉ ପାଦପରେ ।
କଳିକା ଯେତେକ ଫୁଲ ଫୁଟିଯିବ,
ଆମ୍ବ ବଉଳର ମଧୂର ମହକ
ମହୁଆର ମଦହୋସ ବାସ୍ନା
ଚଉଦିଗେ ମହକି ଉଠିବ ।
ଶୋରିଷ ସୂର୍ଯ୍ୟମୂଖୀ
ହଳଦିଆ ଶାଢୀରେ ସାଜିବେ,
କୃଷ୍ଣଚୁଡା ବି ଫୁଲେଇ ହେବ
ନାଲି ନାଲି ତାର ଶାଢୀର ଚମକ ଦେଖାଇ,
ଧରିତ୍ରୀ ରାଣୀ ବି ସବୁଜ ଶାଢିରେ
ତନୁ ତା' ସଜାଇ, ରଙ୍ଗ ବେରଙ୍ଗି ଫୁଲର
ଛିଟପକା ଧଡି ଦେଖାଇବ ।
ମଳୟ ଆସିବ, ବଡ ଦୁଷ୍ଟ ସିଏ,
ଛୁଇଁଯିବ ଯେତେ କୁଆଁରୀ କଳିକାର ଦେହ,
କୁତୁ କୁତୁ କରିଯିବ ଏ ଫୁଲକୁ ସେ ଫୁଲକୁ
ଭ୍ରମର ତ ଇର୍ଷାରେ ଜଳିବ,
ହେଲେ ଚଗଲା ମଳୟ,
ଫଗୁଣରେ ଆହୁରି ମତୁଆଲା ହେଉଥିବ ।
କୋଇଲି ଆସିବ କୁହୁ କୁହୁ ଗୀତ ଗାଇ
ମୋହି ନେବ ସବୁରି ମନ ସେ,
ବସନ୍ତ ଆସିବ ରଙ୍ଗ ସଙ୍ଗେ ମହକ ଆଣିବ
ଧୀର ଧୀର ମୃଦୁ ମଳୟରେ,
କୋଇଲିର କୁହୁତାନ ଶୁଷ୍କ ପ୍ରାଣେ ଭରିଦେବ
ପ୍ରଣୟର ସଂଜୀବନି ଦେଇଯିବ ।
ସ୍ୱାଗତଂ ହେ ପ୍ରେମର ବସନ୍ତ,
ତୁମ ଆଗମନ ପାଇଁ ଏ ସକଳ ସୃଷ୍ଟି
ବାହୁ ମେଲି ଅନାଇ ବସିଛି,
ତୁମ ମଧୁ ଆଲିଙ୍ଗନର ଆଶା ସଂଯୋଗୀ ରଖିଛି ।