ବୃଦ୍ଧାଶ୍ରମରୁ ଚିଠି
ବୃଦ୍ଧାଶ୍ରମରୁ ଚିଠି
~~ ବୃଦ୍ଧାଶ୍ରମରୁ ଚିଠି ~~
ଲକ୍ଷ୍ମୀକାନ୍ତ ଜଗନ୍ନାଥ ଚରଣେ ଶରଣ,
ଧ୍ୟାନରେ ପଢିବୁ ବାବୁ ରେ...ହୋ .. ଲେଖିବା କାରଣ।
ଆମ୍ଭେ ବୁଢା ବାପ ମାଆ କେଉଁ ପାପ କଲୁ ,
ବୃଦ୍ଧାଶ୍ରମେ ଛାଡି ଟିକେ ଖବର ନନେଲୁ ।
ଦୁଇ ଚାରି ପୁଅ ଆମ୍ଭେ କରିନୁ ଜନମ,
ଏକୋଇରବଳା ବାପ ତୁ ଜୀବନଧନ ॥
ତୋ ଆସିବା ବାଟ ମାଆ... ଚାହିଁଛି ରାତି ଦିନ॥୧॥
ଧ୍ୟାନରେ ପଢିବୁ ବାବୁ ଲେଖିବା କାରଣ ।
ବୃଦ୍ଧାଶ୍ରମେ ଅଧାପେଟ ଖାଇ ପଡିଅଛୁ,
ସେ ଖାଇବା କି ଖାଇବା ନମରି ଜୀଇଛୁ ।
ଖଣ୍ଡେ ଖଣ୍ଡେ ଛିଣ୍ଡାଲୁଗା ପିନ୍ଧି କାଟୁଦିନ,
ଔଷଧ ଅଭାବେ ରୋଗ ବଢେ ଦିନୁ ଦିନ ॥
ବଇଦ ଦେଖେଇବାକୁ... ପାଖରେ ନାହିଁ ଧନ ୨॥
ଧ୍ୟାନରେ ପଢିବୁ ବାବୁ ଲେଖିବା କାରଣ ।
ଜୀବନର ଜମାପୁଞ୍ଜି ସବୁ ଖର୍ଚ୍ଚ କରି,
ଉଚ୍ଚ ଶିକ୍ଷିତ କରିଲି କରିଲୁ ଚାକିରୀ ।
ମନରାଜି ବୋହୁ ଦେଖି ବିବାହ ହୋଇଲୁ,
ଘରବାଡି ଡିହ ବିକି ସହରେ ରହିଲୁ ॥
ଆସି ସଙ୍ଗେ ନେଇଯିବୁ ... ଖାଇଲୁ ମାଆ ରାଣ ॥୩॥
ଧ୍ୟାନରେ ପଢିବୁ ବାବୁ ଲେଖିବା କାରଣ ।୧।
ବୁଢୀ ମା ଆକ୍ଷି କୋଟରୁ ଶୁଖିଲାଣି ଲୁହ,
ମାଟି କାମୁଡି ପଡିଛି ଦେଖିବ ତା ପୁଅ ।
ଚିଠି ପଢି ବାବୁ ସଙ୍ଗେ ନେଇଯାଅ ଘର,
ଅନ୍ୟଥା ନୃଶଂସ ବୋଲି କହିବ ସଂସାର॥
ସନ୍ତାନହୀନ ଦରିଦ୍ର... ପାଇଁ ବୃଦ୍ଧଆଶ୍ରମ ॥୪॥
ଧ୍ୟାନରେ ପଢିବୁ ବାବୁ ଲେଖିବା କାରଣ ।
ତୋ ପରି ସନ୍ତାନ ଯେତେ ଅଛନ୍ତି ସଂସାରେ,
ବୃଦ୍ଧ ପିତାମାତା ଛାଡି ଜରାଆଶ୍ରମରେ ।
ନିଜେ ସୁଖରେ ରହନ୍ତି ପତ୍ନୀ ପୁତ୍ର ଘେନି,
ବଡ ଅଭାଗା ସନ୍ତାନ ପାରନ୍ତିନି ଜାଣି ॥
ଘୋର ପାପ ବିପତ୍ତିକୁ... କରନ୍ତି ନିମନ୍ତ୍ରଣ ॥୫॥
ଧ୍ୟାନରେ ପଢିବୁ ବାବୁ ଲେଖିବା କାରଣ ।