ବୃଦ୍ଧା ମା ର ବିଳାପ -ରୀତା ଅପରlଜିତା

ମାଆର ଆଖିରୁ ଲୁହର ଧାର 

ଥର ଥର ହାତରେ ସେ ବିଳାପ କରି

ନିଜ ରଙ୍କ ରତନକୁ ଚିଠିଟିଏ ଲେଖୁଛି

ଭାରି ଅଝଟିଆ ଥିଲୁ ଛୋଟ ବେଳେ

ତତେ ଜହ୍ନ ଦେଖେଇ 

କେତେ ଭୁଳେଇଭାଲେଇ ଖୁଆଉଥିଲି

କେତେ କଷ୍ଟରେ ବଡ଼ ମଣିଷ କରିଥିଲି

ବଡ଼ ପରିବାର 

ଅଳ୍ପ ରୋଜଗାରରେ 

ଅଭାବ କଣ ତତେ 

ଜାଣିବାକୁ ତତେ ଦେଇନଥିଲି ....?

ବାପ ଛେଉଣ୍ଡ ବୋଲି ତତେ ଜାଣିବାକୁ ଦେଇ ନଥିଲି

ଆଜି ବଡ଼ ହେଇ ଚାକିରୀ ବାକିରି କରି

ଘର ସଂସାର କଲୁ।

ମୁଁ ତୋ ପାଇଁ ବହୁତ ଖୁସି

ଗୁଲଗୁଲିଆ ନାତି ନାତୁଣୀକୁ

କୋଳରେ ଧରିବାର ସୁଯୋଗ ଦେଲନି

ପ୍ରଭୁ ....।

କେଉଁ ଦୂର ବିଦେଶରେ 

ରହିଲୁ ବାପା ଏ ବୁଢ଼ୀ ମାଆକୁ 

ଭୁଲିଗଲୁଣି ଦୁଃଖି ଧନ 

ମୋ ରଙ୍କ ରତନ

ମାଆର ଅନେକ କଷ୍ଟ ଅଛି

ଚିଠିରେ କଣ ଲେଖିବି ...?

ତୁ ଭଲରେ ଥା

ଜଗନ୍ନାଥ ତତେ ଘଣ୍ଟ ଘୋଡାଇ ରଖନ୍ତୁ।

ଚିଠି ପାଇ ଚିଠି ଦେବୁ

କେବେ ସୁବିଧା ହେଲେ 

ଏଇ ଦୁଃଖି ମାଆକୁ ଭେଟି ଆସିବୁ।

ଇତି ତୋର ବୋଉ