ବନ୍ୟା
ବନ୍ୟା
1 min
6.6K
ଥମ୍ ଥମ୍ ଆକାଶ
ଅସ୍ଥିର ପବନ
ମାଟିର ବେହରଣରେ
ଉଚ୍ଛନ୍ନ ନଈ
ଉତୁରି ପଡୁଥିବା ଚା' ପରି ବନ୍ୟା !
ଚାଳରେ କାଉ ବସିବା ଶୁଣିଥିଲି
ଚାଳରେ ବସି ଲୋଚା କୋଚା ବୁଢୀଟି
ସବୁ ନାଚାରପଣ ସହ
ଲୁହର ଲାଜ ରଖୁଥିଲା
ଭରା ନଈ ଛାତିରେ
ମାତ୍ର ଦି'ବୁନ୍ଦା ଲୁହ !!
ବେକେ ପାଣିରେ ବୁଡି ବୁଡି
ରିଲିଫ୍ ପୁଡିଆ ସହ
ଲୋକଟି ଆଣୁଥିଲା "ପାଣି ପାଉଚ"
ଜିଇଁବାକୁ ଚାହୁଁନଥିବା
ଅଥଚ ଜୀବନର ଖୋଳ ଭିତରେ
ବାଧ୍ୟ ହୋଇ ରୁନ୍ଧି ହୋଇଥିବା କିଛି ଚେହେରା
ମୃତ ପଶୁଂକ ଆଖିଭଳି ଆଖିରେ
ନଈକୁ ଦେଖୁଥିଲେ
ବିଲକୁଲ କେବେ ଦେଖିନଥିବା ପରି !
ଶୁନଶାନ ରାତିରେ
ଲୁଚି ଲୁଚି ଦରଜା ବାଡଉଥିଲା-
ପାଣି !!