ବନ୍ଧୁତା ନୁହେଁ

ତୁ ବାନ୍ଧବୀ ନା ଭଗ୍ନୀ !!

କୋଉ ଜନ୍ମର ସାରଥୀ !!

ଏ ବିଷୟଟି ତର୍କ ଠାରୁ ଖୁବ ଉର୍ଦ୍ଧରେ ।

କୈଫିୟତ ଦେବା ଆମ ଇଚ୍ଛା ବିରୁଦ୍ଧ ।

ଜୀବନର ମଧ୍ୟାନ୍ନ ଦ୍ବିପ୍ରହରରେ ଫିକା ପଡିନି ଆମ ଅମାୟିକ ମନ ।

ଆଶା , ନିରାଶା , ଈର୍ଷ୍ୟା , ଅଭିଯୋଗର ଛାଇ ପଡିନି ଆମ ସମ୍ପର୍କରେ ।

କାହା ପାଇଁ ମନରେ କିଛି କ୍ଳେଶ ବି ନାହିଁ ।

ଛୋଟ ବଡ ସମସ୍ତ ପରୀକ୍ଷାରେ ଆମେ ଆଜି ଯାଏ ଉତ୍ତୀର୍ଣ୍ଣ

ପଚିଶ ବର୍ଷର ବନ୍ଧୁତାର ଏକ ଅନାବିଳ ପରାକାଷ୍ଠା ଆମେ।

ଆନ୍ତରିକ ବୁଝାମଣାର ସ୍ୱତନ୍ତ୍ର ଉଦାହରଣ ।

ମୋତେ ଘଣ୍ଟ ଘୋଡେଇ ରଖିବାରେ ତୋର ଆନନ୍ଦ ।

ତୋତେ ଖିସିରେ ଦେଖିଲେ ମୁଁ ବିଭୋର ।

ଦୂରତ୍ୱର ତିକ୍ତ ସାଗରରେ ବିଲୀନ ହେଇଯାଏ କେତେ କେତେ ମନ।

କିନ୍ତୁ ଏତେ ବର୍ଷର ତୋର ବିଦେଶ ରହଣୀ ଭିତରେ , ଆମ ସ୍ନେହରେ ଲୀନ ହେଇ ଯାଇଛି ଦୂରତ୍ୱର ସମସ୍ତ ମାନ ।

ଆମ ଭିତରେ ବାର୍ତ୍ତାର ନୁହେଁ, ଆଜିଯାଏ ହେଇଛି କେବଳ ଆତ୍ମାର ଆଦାନ ପ୍ରଦାନ ।

ଜୀବନର ଅହଂରହିତ ସାଗରରେ ଭାସିଯାଉ ଯାଉ ଆମେ ସମ୍ପର୍କର ଏମିତି ଏକ କୂଳରେ ଲାଖି ରହିଛୁ ,

ଯେଉଁଠି ମୋ ଅନ୍ତର କଥା ତୋତେ କହିବା ଯେତିକି ସହଜ ହୁଏ , ନିଜକୁ ନିଜ କଥା କହିବା ତା ଠାରୁ ଅନେକ କଠିନ ।

ମୁଁ କହିବା ଆଗରୁ ମୋତେ ତୁ ବୁଝିଯିବା , ତୁ କହିବା ଆଗରୁ ତୋତେ ମୁଁ ବୁଝିଯିବା ---- ବନ୍ଧୁତା ନୁହେଁ ଲୋ , ଏହା ଈଶ୍ୱରଙ୍କର ଆଶୀର୍ବାଦ ।