ବିନ୍ଦୁର ମହତ୍ୱ

ଛୋଟଛୋଟ କଣିକାରୁ ମେଘ ହୁଏ ସୃଷ୍ଟି

ସାରା ପୃଥିବୀରେ କରେ ଆନନ୍ଦର ବୃଷ୍ଟି

ଗୋଟେଗୋଟେ ଵିନ୍ଦୁରୁ ସୃଷ୍ଟି ସାଗରର

ଜଳ ଜୀବନ ହୋଇଯାଏ ଜୀବଜଗତର

ଗୋଟେଗୋଟେ ଇଟାରେ ଗଢ଼ା ହୁଏ ଘର

ଘର ପୁଣି ହୋଇଯାଏ ସରଗର ପୁର

ଛୋଟଛୋଟ ଶିକ୍ଷାରୁ ମିଳଇ ସଂସ୍କାର

ସଂସ୍କାର ଥିଲେ ହୁଏ ପଥ ପରିଷ୍କାର

ଛୋଟଛୋଟ ଆଶା ଭରେ ମନରେ ଆଲୋକ

ନିରାଶ୍ରୟଃ ହୃଦୟରେ ଜଳଇ ଦୀପକ

ଛୋଟଛୋଟ ଘାସମିଶି ସୁନ୍ଦର ଗାଲିଚା

ଗାଲିଚା ମଧ୍ୟରେ ଶୋଭା ଫୁଲର ବଗିଚା

ଛୋଟଛୋଟ ପିଲାମାନେ ଫୁଲର ସଦୃଶ

ପିଲାଙ୍କର ସୁରକ୍ଷାରେ ଦେଶର ଭବିଷ୍ୟ

ଗୋଟେଗୋଟେ ଫୁଲ ମିଶି ମାଳ ବନିଯାଏ

ଅନୁପମ ସୌନ୍ଦର୍ଯ୍ୟର ଅଧିକାରୀ ହୁଏ

ଛୋଟଛୋଟ ଦେଶ ମିଶି ଗଢ଼ା ହୁଏ ବିଶ୍ୱ

ସ୍ନେହ ପ୍ରେମ ଭରିଦିଏ ବିଶ୍ୱରେ ହରଷ

ସଭିଙ୍କର ମନମିଶି ଯେବେ ଏକ ହୁଏ

ବୈକୁଣ୍ଠ ରୂପକ ଶାନ୍ତି ସେଠି ଶୋଭାପାଏ

ଇର୍ଷା ମାନ ଅଭିମାନ ସବୁ ଦୂରହୁଏ

ଏକତାର ରଜ୍ଜୁରେ ବାନ୍ଧି ହୋଇଯାଏ ।