ଭକ୍ତିଗୀତ ଅନ୍ତାକ୍ଷରୀ (ତୁଳସୀ )

ତୁଳସୀ ତୁଳସୀ ବାସ ମହକୁଛି

ଜଳ ଦେଇ ଚଉରାରେ

ପ୍ରଭୁଙ୍କ ନାମକୁ ସ୍ମରଣ କରିକି

ଧ୍ୟାନ ଦିଅ କର୍ତ୍ତବ୍ୟରେ ll

ରହୁଛି ଅନାଇ ଆଶୀର୍ବାଦ ପାଇଁ

ପ୍ରଭୁଙ୍କର ପାଦତଳେ

ଦିଅ ଶକ୍ତି ପ୍ରଭୁ କରୁଣା ପ୍ରସାରି 

ରଖ ମୋତେ ଆଢୁଆଳେ ll

ଲୀଳାମୟ ପ୍ରଭୁ ଭକ୍ତର ଠାକୁର

ଭକ୍ତ ବାଞ୍ଛା ପୂର୍ଣ୍ଣକର

ହାତ ଯୋଡି ମୁଇଁ ଶରଣ ପଶୁଛି

ଦୁଃଖ କଷ୍ଟ ଦୂର କର ll

ରଖ ବା ନ ରଖ ଗୁହାରି ମୋହର

ତୁମ ନାମ ଜପୁ ଥିବି

ଦୟାର ଠାକୁର ଦୟା ରଖିଥିବ

ଗୁଣ ତୁମ ଗାଉଥିବି ll

ବନ୍ଧୁ ପରିଜନ ଆତ୍ମୀୟ ସୋଦର

ରହୁ ପୁରି ପ୍ରୀତି ମୋର

ତୁମରି ଦୟାରେ ମୁହିଁ ନିଃସ୍ଵାର୍ଥରେ

ମନ ରଖେ ନିରନ୍ତର ll

ରହିଛି ଅନାଇ ଶ୍ରୀମୁଖକୁ ଚାହିଁ

ନାମ ଜପେ ଜଗନ୍ନାଥ

ନାଥ ଜଗତର ଜଗତ ଈଶ୍ୱର

ତୁମେ ମୋ ପ୍ରାଣର ନାଥ ll

ଥକି ଥକି ପଥ କରେ ଅତିକ୍ରମ

ତୁମକୁ କରି ବିଶ୍ୱାସ

ତୁମରି ବଳରେ ମୁହିଁ ଚିନ୍ତା କରେ

ତୁମେ ହିଁ ମୋର ପ୍ରଶ୍ୱାସ ll

ସକଳ ପ୍ରାଣୀର ତୁମେ ହିଁ ଆଧାର

ତୁମେ ହିଁ ପରମ ପିତା

ପାଳନ ତାରଣ କଷଣ ହାରଣ

ଜଗନ୍ନାଥ ତ୍ରାଣକର୍ତ୍ତା ll

ତୋର ଦରଶନ ପାଇଁ ମୋର ପ୍ରାଣ

ସଦା ହୁଏ ଆନମନା

ସତ୍ୟ ଧର୍ମ ପଥେ ଘେନିଯାଅ ମୋତେ

ଯୋଗାଅ ସଦା ପ୍ରେରଣା ll

ନମଇଁ ପ୍ରୟର ବାରେ କୃପା କର

ସର୍ବବ୍ୟାପୀ ଭଗବାନ

ଜ୍ଞାନର ପ୍ରଦୀପେ ଅହଂ ଦୂର କର

ତୁମରି ପାଦେ ଜଣାଣ ll