ବେନି ସହୋଦର
ବେନି ସହୋଦର
ବାବୁରେ,ହିଂସା ପରିହାର କର
ଯୁବ ପିଢି ଆମ ଜାତୀୟ ସମ୍ପଦ
ତା ମର୍ଯ୍ୟାଦା ରକ୍ଷା କର ।
ଜାତିର ଜନକ ମହାତ୍ମା ଗାନ୍ଧୀ
ଅହିଂସା ପୁଜାରୀ ଥିଲେ,
ଅହିଂସା ଅସ୍ତ୍ର କୁ ପ୍ରୟୋଗ କରି ସେ
ଇଂରେଜ ଚକିତ ହେଲେ ।
ସମ୍ପୂର୍ଣ୍ଣ ଭାବରେ ନିଶା ନିବାରଣ
ଥିଲା ଗାନ୍ଧୀଜୀଙ୍କ ଲକ୍ଷ,
ତାହାର ସୁଫଳ ପାଇ ନାରୀକୂଳ
ସମାଜେ ହେବେ ସୁରକ୍ଷା ।
ନିଶା ଆଉ ହିଂସା ବେନି ସହୋଦର
ଏକଥା ତ ସର୍ବ ଜ୍ଞାତ,
ବୁଦ୍ଧି ଜ୍ଞାନ ଆଉ ବିବେକ ସମ୍ପଦ
କରିବ ସେ ପରାହତ ।
ସମାଜ ସନ୍ତାନ ପରିବାର ପାଇଁ
ବିଡମ୍ବନା ସେ ହୋଇବ,
ଘୃଣିତ କଟାକ୍ଷ ହୀନ ପରିଚୟ
ତା ପାଇଁ ଘାତକ ହେବ।
ମର ସଂସାରରେ ସୁନ୍ଦର ଜୀବନ
ନାହିଁ ତାର ପଟାନ୍ତର,
ଏ ପାନ୍ଥଶାଳାରେ ସଂକ୍ଷିପ୍ତ ରହଣୀ
ଏହି ତ ଅସ୍ଥାୟୀ ଘର ।
ଗ୍ୟାନ, ବୁଦ୍ଧି ଆଉ ବିବେକ ସମ୍ପଦ
ଦେଇଛି ସେ ଶୂନ୍ୟ ରୂପୀ,
ତାର ଉପଯୋଗ କରିବା ପାଇଁକି
ସମୟ ଯେ ସର୍ବବ୍ୟାପୀ।
ସର୍ବଶ୍ରେଷ୍ଠ ଏହି ମଣିଷ ଜୀବନ
ପ୍ରାଣୀକୂଳର ମହତ,
ଅନ୍ୟ କେଉଁ ପ୍ରାଣୀ ଆୟତ କରିନି
ପ୍ରଭୁଙ୍କ ର ଦାନ ଏ ତ।