ଅସୁରକ୍ଷିତ ପରୀ
ଅସୁରକ୍ଷିତ ପରୀ
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ସରଗ ରାଇଜୁ ଆସିଅଛି ପରୀ
ଅପରୂପା ଶୋଭା ନେଇ,
ଅପାର ପୁଲକ ମନରେ ଭରିଛି
ଆନନ୍ଦ ପରଶ ଦେଇ |୧|
ଗୋଲାପ କଳିକା ତା ଅଙ୍ଗ କୋମଳ
ଭୁରୁ ଭୁରୁ ବାସ ଦିଏ,
ପବନେ ଚହଲେ ବସନ୍ତେ ଦୋହଲେ
ତନୁ ମନ ଦୋହଲାଏ |୨|
ସେଇ ଛୋଟ ପରୀ ଆନନ୍ଦ ଲହରୀ
ଆସି ଦୁଆରରେ ଖେଳେ,
ତାର ଉପସ୍ଥିତି
ଆଣେ ମନେ ଖୁସି
ପରିବାର ସାଥି ମେଳେ |୩|
ଆମ ଘର କନ୍ୟା ଗୁଣରେ ଅନନ୍ୟା
ସରଗ ପରୀକୁ ବଳି,
ନୂପୁର ଛନ୍ଦରେ ତା ପାଦ ଚାଲିରେ
ମୁକୁତା ପଡ଼ଇ ଝରି |୪|
କନ୍ୟା ଅଟେ ରତ୍ନ
ସମାଜରେ ଯତ୍ନ
ସୁରକ୍ଷିତ ପ୍ରଜାପତି,
ଅତି କୋମଳତା ତାର ଆଖି ପତା
ସାଧବ ବୋହୂର ଗତି |୫|
ଅଦିନ ଝଡ଼ରେ ଦୂରାତ୍ମା ମାଡ଼ରେ
ଭାଙ୍ଗିଯାଏ ପଦ ଛନ୍ଦ,
ନାଲି ଆଖିବାଲା ସୁରା ପାନ ବାଲା
ଚିହାଁଣୀ ତାଙ୍କର ମନ୍ଦ |୬|
ଲୋଲୁପ ଦୃଷ୍ଟିରେ ସମାଜ ଭାଙ୍ଗେରେ
ହଜିଯାଏ ଟିକି ପରୀ,
ସଜଳ ଆଖିରେ କଜଳ ହଜେରେ
ହୃଦୟ ଉଠଇ ଥରି |୭|
କେତେ କେତେ ପରୀ ହଜିଗଲେ ହାରି
ଉଜୁଡ଼ା ସମାଜଟାରେ,
ତାଙ୍କ ସୁରକ୍ଷାରେ
ଏ ସମାଜ ହାରେ
କାହାକୁ କହିବା ଆରେ |୮|
କଥାରେ କଥାରେ ଆଇନ ବାଟରେ
ଫାଇଲ ଭିତରେ ରହେ,
ଅସଲ ବେଳକୁ ଆଇନ ଫାଙ୍କରେ
ଦୋଷି ପୁଣି ଚିଲିଯାଏ |୯|
ଅସୁରକ୍ଷିତ ଏ କନ୍ୟାରତ୍ନ ପରୀ
ଦାୟିତ୍ବ ସବୁ ଆମରି,
ଆମ ମାନସିକ ଅବସ୍ଥା ସୁଧିଲେ
ସୁରକ୍ଷିତ ହେବେ ପରୀ |୧୦|