ଅଜାଙ୍କ ସାଥିରେ ମଜା

ଚଗୁଲୁ ବଗୁଲୁ   ଆଉ ତୁଲୁ ମୂଲୁ 

     ଖେଳୁଥିଲେ ଆମ୍ଵ ତୋଟାରେ

ଶୋଇଥିଲେ ଅଜା ନେଉଥିଲେ ମଜା

     ପଡ଼ିଗଲା ଆମ୍ବ ପେଟରେ ।।

ଛାଡ଼ି ହୁଙ୍କା ରଡ଼ି  ଧରି ବଙ୍କା ବାଡ଼ି

      ଗୋଡ଼ାଇଲେ ଅଜା ରାଗରେ

ପଡ଼ି ଉଠି ପଡ଼ି ଦଉଡ଼ି ଦଉଡ଼ି

      ବଗୁଲୁ କହୁଚି 'ଭାଗୋ'ରେ ।।

ଦେବଟି ଚାପୁଡ଼ା  ମାରିଦେବ ବୁଢ଼ା

      ଖଇ ଫୁଟିଯିବ ପିଠିରେ

ଭାତରନ୍ଧା ଖେଳ ଆଉ ସାଙ୍ଗମେଳ

       ସାରିଦେବ ସବୁ ଲାଠିରେ ।।

ଶୁଣ ଶୁଣ ପିଲେ  ଡର ନାହିଁ ମୋତେ

       ମାରିବିନି ଜମା ସତରେ

 କଥାଟି ଗୋଟିଏ   ବୁଝାଇ କହିବି

        ଶୁଣିଲେ ହସିବ ମଜାରେ ।।

ଏହି କଥା ଶୁଣି   ଚଗୁଲୁ କହିଲା

      ବାଡ଼ି ଯେଣୁ ତୁମ ହାତରେ

ଯିବୁନାହିଁ ଅଜା ବଜାଇବ ବାଜା

      ଚଖାଇବ ଆମ ପିଠିରେ ।।

ବାଡ଼ି ଫିଙ୍ଗି ଦେଇ ଟିକେ ଦୂର ଯାଇ

      ଅଜା ପଡ଼ିଗଲେ ଘାସରେ

ଚଗୁଲୁ ବଗୁଲୁ   ଆଉ ତୁଲୁ ମୂଲୁ

        ଆସି ଗଡ଼ିଗଲେ ହସରେ ।।