ଅଗ୍ନି
ଅଗ୍ନି
1 min
527
ସକଳ ଶକ୍ତିର ଆଧାର ସୂରୁଜ
ଅଗ୍ନିର ପିଣ୍ଡୁଳା ସିଏ
ଅନ୍ଧାର ହଟାଇ ଅଗ୍ନି ଜାଳିଦିଏ
ଆଲୋକ ବର୍ତ୍ତିକାଟିଏ ।
ଜନମ ବେଳରେ ଏନ୍ତୁଡ଼ି ଶାଳରେ
ଅଗ୍ନି ପ୍ରଜ୍ଜ୍ଵଳିତ ହୁଏ
ଅଗ୍ନିର ପରଶେ ନୂତନ ଜୀବନ
ବଞ୍ଚିବାର ରାହା ପାଏ ।
ମରଣ କାଳରେ ମଶାଣି ଭୁଇଁରେ
ଅଗ୍ନି ଜଳିଉଠେ ଯେବେ
ରକ୍ତ ମାଂସ ଦେହ ନାଶ ହୋଇଯାଏ
ଆତ୍ମା ମୁକ୍ତିପାଏ ତେବେ ।
ଅଗ୍ନି ବିନା ପାକ ହୁଏନା ସମ୍ଭବ
ଖାଦ୍ୟ ରୁଚିକର ନୁହେଁ
ହିଂସ୍ର ଜନ୍ତୁଠାରୁ ସୁରକ୍ଷା ଦେବାରେ
ଅଗ୍ନି ସହାୟକ ହୁଏ ।
ନିମିତ୍ତ ମାତର ମାନବ ମୁଁ ଛାର
ନାହିଁ ମୋର ସୂକ୍ଷ୍ମଜ୍ଞାନ
କେମନ୍ତେ ବର୍ଣ୍ଣିବି ଅଗ୍ନିର ମହିମା
ପଞ୍ଚଭୂତ ଉପାଦାନ ।