ଅଛିଣ୍ଡା ଗଣିତ

କିଏ ସେ ପାରିଛି ଗଣି

ଆକାଶର ତାରା

କିଏ ବା ମାପି ପାରିଛି

ବରଷାର ଧାରା।

କିଏ ସେ ଜାଣିଛି କୁହ

ଭବିଷ୍ୟତ ପଥ

କିଏ ସେ ଗଣିଛି କୁହ

ଅତୀତ ର ସୁଖ ଦୁଃଖ।

କିଏ ବା ଜାଣିଛି କାହା

ମନ ତଳ କଥା

କେହି କି ଜାଣିଛି କିଆଁ

ଜାଗେ ନିରବତା।

ସମୁଦ୍ରର ଊର୍ମି ପରି

କେତେ ଉଦବେଳନ

କାହିଁ ଶୁଭୁଥାଏ ତାର

ଗମ୍ଭୀର ଗର୍ଜନ।

କାହା ପାଇଁ ପାଟ ଛତା

ହାତୀ ଘୋଡା ଆହା

କା ପାଇଁ କି କଣ୍ଟକିତ

ପାଦେ କଣ୍ଟା ଥୁଆ ।

କିଏ ନିତି ଜଳି ଜଳି

ପାଲଟେ ପାଉଁଶ

ସବୁଥାଇ ନିଦ ନାହିଁ

ରାତି ଲାଗେ ବିଷ।

ଗଣୁଥାଏ କଷୁଥାଏ

ଅଛିଣ୍ଡା ଗଣିତ

ସରିନି ସରିବ ନାହିଁ

ଜୀବନର ଗୀତ।

ଅନୁଭବ କରି ପାର

ଏକାନ୍ତରେ ବସି

ଅଛିଣ୍ଡା ଗଣିତର କି

ହୁଏ କେବେ ଇତି।