ଅବଶେଷ ରହିଛି
ଅବଶେଷ ରହିଛି
ଚାରି କାନ୍ଥ ଘେରା
ପ୍ରକୋଷ୍ଠରେ,
ସ୍ବପ୍ନିଳ କ୍ଷଣଠୁ ଭାରି ମୁଦିଲା ପଲକର ସ୍ବପ୍ନ!
ଚକ୍ଷୁ ନିମିଳିତ ଓଜନିଆ ମନ
ନା ସ୍ବାଧୀନତା ନା ଜୀବନ୍ତ ତା!
ତଥାପି, କିଛି ଶାନ୍ତ ଚେତନା ବୋଧହୁଏ ଅବଶେଷ ଅଛି ।
କାହାକୁ କେତେ ଭଲ ପାଇଲି କେତେ ସ୍ନେହ ଦେଲି,
କାହା ଆଖିରେ ନିଜକୁ କେତେ ଖୋଜିଲି,
ଅଥବା,
ନିଜର ଅହଂକୁ ସେଇ ଦୃଷ୍ଟିର ଭଉଁରୀରେ ବୁଡ଼ାଇ ଦେଲି !!
ଅଶେଷ ଯନ୍ତ୍ରଣା !
ତଥାପି, ବୋଧହୁଏ ଆଶାର ଅବଶେଷ ରହିଛି ।
କେବଳ ଦୁଇଟି ଦୁଆରେ,
ମୁଣ୍ଡ ନୁଆଇଁଛି ମୁଁ....
ଈଶ୍ବରଙ୍କ ମନ୍ଦିର
ଆଉ ପ୍ରୀତିମାନଙ୍କ
ହୃଦୟ ରାଜ୍ୟରେ !
ନା ତାଙ୍କର ହେଲି,
ନା କରୁଣ କାହାଣୀ ଶୁଣିଲେ ଈଶ୍ୱର !
ମନ ପ୍ରତିଧ୍ଵନି ହୁଏ ବାରମ୍ବାର,
କିଛି ଭାବନା ବୋଧହୁଏ ଅବଶେଷ ଅଛି ।
କାହାକୁ ଦେଖାଇବି ଏଇ ଜୁଆର ଭଟ୍ଟାକୁ ?
ନୟନ ସରିତା ଆଉ
ମନର ଜ୍ବାଳାକୁ ?
ଅପମାନ ଅନେକ ସହିଛି,
କିନ୍ତୁ କିଛି ବିଶ୍ବାସ ବୋଧହୁଏ ଅବଶେଷ ରହିଛି ।