ଆସିଛିରେ ହୋଲି

ଆସିଛିରେ ଆଜି ହୋଲି

ରାଗ ରୁଷା ଭୁଲି ମଉଜେ ଖେଳିବା

ସଭିଏଁ ହୋଇଣ ମେଳି

ସାତରଙ୍ଗ ସହ ପ୍ରେମରଙ୍ଗ ଦେଇ 

ଦେହରେ ହୋଇବା ବୋଲି

ଆସିଛି ରେ ଆଜି ହୋଲି ।

ବାଇଗଣି ନୀଳ ଘନନୀଳ ଲାଲ

ସାଥେ ନାରଙ୍ଗୀ ସବୁଜ

ହଳଦୀଆ ରଙ୍ଗ ଲାଗିଲେ ଅଙ୍ଗରେ 

ଛାଡ଼ିଯିବ ତହୁଁ ଲାଜ

ଅତି ସରାଗରେ ଆଣିଛି ସାଙ୍ଗରେ 

ରଙ୍ଗରେ ପୁରିଛି ଥାଳି

ଆସିଛିରେ ଆଜି ହୋଲି ।

ଭେଦଭାଵ ଭୟ ଦୂର ହୋଇ, ସ୍ନେହ

ନିକଟେ ଆସିବ ବସି

ମାନ ମନାନ୍ତର ହୋଇବ ଅନ୍ତର 

ମତାନ୍ତର ଯିବ ଭାସି

ମନ ଗଗନରେ ହସର ଭଉଁରି              

ଅଭିମାନ ଯିବ ଚାଲି 

ଆସିଛିରେ ଆଜି ହୋଲି ।

ଧୋଇଯିବ ରଙ୍ଗ ନ ରହିବ ଦାଗ

ଆଜି ନ ହେଲେ ସେ କାଲି

ପ୍ରେମରଙ୍ଗ ଥରେ ଲାଗିଲେ ତନୁରେ 

ଯାଉଥିବ ଜଳିଜଳି

ସାତରଙ୍ଗ ସହ ପ୍ରେମରଙ୍ଗ ଦେଇ

ମଉଜେ ଖେଳିବା ହୋଲି

ଆସିଛିରେ ଆଜି ହୋଲି ।