ଆମ ନିଧି ଅଜା

ବୟସ ଷାଠିଏ ଆଠ ଟପିଲାଣି

ଆମ ନିଧି ଅଜାଙ୍କର

ଦାନ୍ତ ସବୁ ଝଡି ପାକୁଆ ହେଲେଣି

ମନ କିନ୍ତୁ ଯୁବକର ।

ପରିବେଶ ପ୍ରତି ଭାରି ସଚେତନ

ରଖିଥାନ୍ତି ଭାରି ସ୍ୱଚ୍ଛ

ଉପକାର ଗୁଣି ବାଡ଼ିପଟେ କେତେ

ଲଗାଇଛନ୍ତି ସେ ଗଛ ।

ମନହେଲା ଟିକେ ବଜାର ବୁଲିବେ

ଶୂନଗାଡି କଲେ ସଜ

ଆଈ ମୁହଁ ମୋଡି କହିଲା ଅଜାଙ୍କୁ

ଲାଗୁନାହିଁ କିବା ଲାଜ ।

ଶୂନଗାଡି ପରେ ବସିଲେ ଯେମିତି

ପବନରେ ଗଲା ଗଡି

ଅଜା ବିଚାରିଲେ ଡେଣା ଦୁଇ ଅବା

ଦେଇଅଛି କିଏ ଯୋଡି ।

ଭୁଲିଗଲେ ଅଜା ବୟସ ତାଙ୍କର

ଚଳାଇଲେ ବେଗ କରି

ଛିଟିକି ପଡିଲେ ସଡ଼କ ଦାଢ଼କୁ

ଗରଜିଲେ ରଡି କରି ।

ଆଈ ଶୋଇଥିଲା ଅଜାଙ୍କ ପାଖରେ

ଉଠିଗଲା ଶବଦରେ

ଅଜା ପଡ଼ିଥିଲେ ଘର ଚଟାଣରେ

ଥରୁଥିଲେ ସପନରେ ।