उठ करण्या संघर्ष...

जगू नका पशूसम

उठ.…करण्या संघर्ष ।

हिम्मतीच्या बळावर

शक्य जगणे सहर्ष ।।

हाती लेखणी असून

काय करतो आहेस? ।

अत्याचार होतानाही

फक्त बघतो आहेस ।।

नको बनूस मानवा

डोळे असून आंधळा ।

तुझ्या बांधवांना नको

पाहू देऊ अवकळा ।।

तुझा माझा रक्त लाल

मग भेद कसाकाय? ।

कोण म्हणतो शाळेत

नाही ठेवायचे पाय? ।।

हक्क सगळ्यांना आहे

शिकण्याचा, जगण्याचा ।

मनसोक्त पटांगणी

मित्रांसवे खेळण्याचा ।।

जमणार एकवेळ 

पंगू तनाने असता ।

पण जमणार नाही

कधी मनाने असता ।।