Library
Profile
उपेक्षा
उपेक्षा
नका करू उपेक्षा
या गरीब जीवाची ।
लाभू द्या की संधी
मला ही शिकण्याची ।।धृ।।
आहेत असा कुरूप थोडा
मलीन फाटके कपडे ।
बुट टाय स्कूल बॅग
मला न मुळी घडे।
वाढलेल्या झिपऱ्यांना
सदाच वाण तेलाची ।
लाभू द्या की संधी,...।१।।
रस्तोरस्ती गल्लोगल्ली
भंगार आम्ही वेचतो।
रस्त्यावरच्या उकिरड्यात
मीठ-मिरची शोधतो।
सांगा कशी लागेल
संगत वही पेणची।
लाभू द्या की संधी....।२।।
दिस रात राबून माझी
माय पुरती थकून जाते।
रिकामी गाडगी-मडकी
तिची भूकच मरून जाते
सांगा कशी सापडेल तिला
शिदोरी संस्काराची।
लाभू द्या की संधी...।३।।
पाहून सारं बाबा माझा
पुरता कोलमडून गेला
ऐन उमेदीतच कसा तो
जीवच हरवून बसला ।
सांगा कशी सोय लागेल
आता माझ्या होम वर्कची ।
लाभू द्या की संधी ....।४।।
नाही दिला आधार तरी
तसंच थोडे शिकेन ।
उकिरडा तर सुटेल माझा
चांगलं काम करेन।
मिळूद्या मला तरी संधी
जीवन सुधारण्याची।
लाभू द्या की संधी....।५।।
