थंडी

दिसे धुक्याची दुलई

शहरानं ओढलेली

तेव्हा म्हणा जरा तुम्ही

थंडी आली थंडी आली

किती वर्णावा थंडीचा

थाट नवाबी नवाबी

सारे जग दिसे मात्र

आता शराबी शराबी

मग होई सारे जग

हिच्या गारव्याने धुंद

रविराज येतानाच

त्याची चाल करी मंद

पसरले नभी पहा

शरदाचं तारांगण

प्रेमपान्हा फुटे सर्वा

सृष्टी निघते न्हाऊन

येई गुलाबी थंडीत

हेमंतीची शिरशिर

होई बोचरीच जरा

येता थंडीला बहर

शिशिराची पानगळ

दाटे मना हुरहूर

ओढ लावूनिया जाते

पुन्हा येण्या लवकर