अभंग

कशी नाही दया |तुम्हालाही देवा |

आता तरी धावा | लोकांपाशी ||

आकांत आक्रोश | भय शोककळा |

पसरे सकळा | जगावरी ||

मृत्यूचे तांडव | झाले सर्व जगी |

परी तुम्हालागी | दया नाही ||

कैसा तो विषाणू | दिसेना न डोळा |

लढण्याचा सोहळा | बघतोस ||

फोडूनिया टाहो | पुकारा केला हो 

अजुनी तुम्हा हो | जाग नाही ||

बंद ते देऊळ | तुम्ही देवळात |

बाहेर आकांत | चाललासी ||

कान डोळे बंद | म्हणे समचित्त |

ऐसें कैसे चित्त | तुमचे हे ||

धर्म तो रक्षिण्या | तुमची प्रतिज्ञा |

तुमची अवज्ञा | तुम्ही करी ||

सर्वांनी मिळुनी | फोडूया रे टाहो |

उघडे ठेवा हो | मन तरी ||

ऐसे हे बोलणे | आले श्रध्येपोटी |

परी रागापोटी | चिडू  नये ||

आमुची श्रद्धा ही | आमुचा विश्वास |

खोटी मोठी आस  | ठरू नये ||

अभंगाचा प्रपंच | जमला आता का |

विनवी सानिका | सर्वांकडे ||