शब्द माझे सोबती

येता मनात विचार

येती अस्फूट अधरी

किती घाई ती तयांना

उतरण्या कागदावरी

 शब्द माझेची सोबती 

बोलणेही ते शब्दांशी

उरातल्या स्पंदनाना

तोलणेते भावनेशी

चाले खेळ हा शब्दांचा

येती धावत सहज

जणु खुणावूनी वदती

आहे माझीच गरज

 प्रेम भाव तयावर

 करी हसूनी स्वागत

खरोखरी माझे साथी

पूर्ण करिती मनोगत

 शब्द फुले गुंफुनीया

होते तयार कविता

देते मजला आनंद 

होते मनाची पूर्तता