कोजागिरीची रात

खेळता टिपूर चांदण्यात

चंद्रमा अवतरतो अंगणात..

आज कोजागिरीची रात सखे

आज कोजागिरीची रात..!!

सयीचे दुध उकळीस येते

अन् मन रमते नभमंडळात..

स्वप्नांचा चंद्र दुधात नाहतो

मन रंगत जाते केशरात..

आज कोजागिरीची रात सखे

आज कोजागिरीची रात..!!

खुणावते टिपरीस टिपरी

नाद घुमतो आसमंतात..

पैंजणी पदन्यास सुखावतो

खेळूया रास, दे हातावर हात..

आज कोजागिरीची रात सखे

आज कोजागिरीची रात..!!

केशर रंगी शुभ्र दुधाळ कांती

सजला नक्षत्र शृंगार साक्षात..

पुनवेचा चांद येऊ दे भरास

अन् उतरू दे गोडवा दुधात..

आज कोजागिरीची रात सखे

आज कोजागिरीची रात..!!