તું કરને કૈંક કમાઇ

તું કરને કૈંક કમાઇ, આ જીવનનૈયા ચાલી !

આ ભવદરિયાથી તારી, આ જીવનનૈયા ચાલી ! ... તું કરને.

તું વિચાર કર વ્યાપારી, શાને આવ્યો’તો આંહી,

શું હાર્યો જીત્યો ભાઇ, ના રહી ગયો છે ખાલી ?

આ વાયુવેગે તારી, જીવનનૈયા ચાલી !

આ ભવદરિયાથી તારી, આ જીવનનૈયા ચાલી ! ... તું કરને.

ના દ્રવ્ય માન મોટાઇ મિલ્કત તારા સંગાથી,

એ ભાર ડુબાડે ભારી જો હોય નહીં ચતુરાઇ.

આ તુફાનમાંથી તારી જીવનનૈયા ચાલી.

આ ભવદરિયાથી તારી, આ જીવનનૈયા ચાલી ... તું કરને.

જો શ્રદ્ધાનો સઢ સોહે, ને વાયુ પ્રેમનો હોયે,

જો સદાચારની ગાદી, તો લેશ રહે ભય નાહીં.

આ ચોક્કસ વેગે તારી જીવનનૈયા ચાલી.

આ ભવદરિયાથી તારી, આ જીવનનૈયા ચાલી ... તું કરને.

જો નાવિક સત્ય ચલાવે, પૌરુષ હલેસે ચાલે,

લે વિવેકયંત્રે ભાળી, તો રહે નહીં કૈં બાકી.

આ ઉત્તમ એવી તારી જીવનનૈયા ચાલી.

આ ભવદરિયાથી તારી, આ જીવનનૈયા ચાલી ... તું કરને.

અક્ષયશા આતમધનની તે પછી કરાય કમાઇ,

ના મટે તે વિના તારી આ લેશે ગરીબી ભાઇ !

લે અમૂલખ દ્રવ્ય કમાઇ, આ જીવનનૈયા ચાલી.

આ ભવદરિયાથી તારી, આ જીવનનૈયા ચાલી ... તું કરને.