સુખ શાંતિ કેરું ધામ
સુખ શાંતિ કેરું ધામ
સુખ શાંતિ કેરું ધામ, લઇ લે પ્રભુજીનું નામ.
પ્રભુને વસવાનું એ ધામ, લઇ લે પ્રભુજીનું નામ.
બનશે વિશુદ્ધ તારી વાણી,
ગુણ લે પ્રભુનો પાવન જાણી;
મળશે અંતરને આરામ ... લઇ લે.
પ્રભુનું નામ સરોવર ભારે,
તેમા ન્હાવું નિશદિન તારે;
ટળશે તીખા તાપ તમામ ... લઇ લે.
મંગલ મુક્તાફલ આ એવું,
સંત અને શ્રુતિએ પણ સેવ્યું;
આપે અમૃતપદ આ નામ ... લઇ લે.
બેસે દામ નહીં કૈં આમાં,
ભય છે લેશે નહીં ગાવામાં;
લેજે હૈયે રાખી હામ ... લઇ લે.
એનો નશો સદા ગુણકારી,
નાખે ક્લેશ બધાયે મારી;
પી લે પ્રેમે ભક્તિ-જામ. ... લઇ લે.
મનના મેલ બધાયે ટાળી,
લેજે નામ જ પાવનકારી,
માની બીજાં કામ હરામ ... લઇ લે.
ચિંતા સઘળી કોરે મૂકી,
પ્રભુનાં ચરણોમાં બસ ઝૂકી,
રાખી પ્રભુ હાથે જ લગામ ... લઇ લે.
નાનું નામ છતાં ગુણ મોટો,
એનો જડે ન જગમાં જોટો;
કરવા જીવન આ કૃતકામ ... લઇ લે.
અનુભવ કેરું ઔષધ આ છે,
લીધે દર્દ બધાંયે જાશે;
‘પાગલ’ પામ્યા અવિચલ ઠામ .. લઇ લે.