કરી લેને એની સાથે એક યારી

કરી લેને એની સાથે એક યારી.

બીજી યારી કાંઇ કામ ના આવે, 

કષ્ટ વરસાવે છે ભારી ... કરી લેને.

દિલ જો દેવું હો તો એને જ દેને, 

કરને મૈત્રી એની ન્યારી,

એની સુધામાં સ્નાન કરી લે, 

કર એને માટે તૈયારી ... કરી લેને.

ભાવવિભોર બની ગા તું એને 

મમતા બીજી બધી મારી;

ઝાંખી કરી લે એની બધે યે, 

કાયા કંચન કરી તારી ... કરી લેને.

સુંદરતાનો સાગર છે એ તો,

પ્રીતિની માધુરી ન્યારી;

શાંતિ ને શીલનું ધામ ખરેખર,

પ્રીતિ એની લે પાળી ... કરી લેને.

છોડી દે એને તે આંસુ સારે ને,

ભ્રમણામાં ભટકે છે ભારી;

અંધારે મારગ એ અટવાયે, 

અંતરની લઇ છારી ... કરી લેને.

ભૂલી ગયો કેમ મિલ્કત તારી, 

બેઠો પ્રમાદને ધારી ?

‘પાગલ’ ધન્ય દરિદ્ર બન્યા કૈં, 

જીવન દીધું ઉજાળી ... કરી લેને.