ખુશ છું

ખુશ છું હથેળીમાંનો પ્હેલો ઉઘાડ જોઈ

નાની તિરાડમાંથી મોટી તિરાડ જોઈ

બે-ચાર પંખી આવી બસ ધૂણવા જ માંડયા

નાડાછડી કસીને બાંધેલ ઝાડ જોઈ

જોઈને એને, ખોલી નાખે છે બંધ ઘર સૌ

અંદરનો હાલ કહેતો કેવળ કમાડ જોઈ

છે રણભૂમિનો યોદ્ધો, સગપણભૂમિ નો ક્યાં છે ?

એણે હજી અસલની ક્યાં ચીરફાડ જોઈ ?

છું અસ્ત-વ્યસ્ત તો પણ સોહામણો હું લાગ્યો !

શંકા પડી રહી છે દર્પણના લાડ જોઈ

કોઈ હતાશ ચહેરો, નિર્જન તળાવે આવી

નાખી ગયો નિસાસો ત્યાં ભીડભાડ જોઈ