મારે એ ય જોવાનું હતું

થાય નહિ બે આંખને અન્યાય, મારે એ ય જોવાનું હતું

આંસુ સરખા ભાગથી વહેંચાય, મારે એ ય જોવાનું હતું

ક્યાંક જઉં ને ત્યાં વજન મારુ પડે તો એ મને ગમતું હતું

પણ બધાથી એ વજન ઊંચકાય, મારે એ ય જોવાનું હતું

એક-બે પડઘાને શું ગમ્મત સૂઝી કે ઝંપીને બેસે નહીં !

પર્વતોના કાયદા જળવાય, મારે એ ય જોવાનું હતું

એક છત્રી જે બધા વરસાદ ઝીલી, રાખતી કોરો મને

ઘાસ એનાં પર ઉગી ના જાય, મારે એ ય જોવાનું હતું

ન્યાય કરનારા તો ઇશ્વરની દલીલો સાંભળી ભાવુક થયાં

એક તરફી કોઈ ના ખેંચાય, મારે એ ય જોવાનું હતું

માત્ર મારી જિંદગીથી દૂર જઈને મુક્ત તું થઈ નહિ શકે

હોય તું સામે ને ના દેખાય, મારે એ ય જોવાનું હતું

મંચ ઉપર શબ્દ લઈ પ્હોંચી ગયો છું હું, એ કૈં પૂરતું નથી

આ સભાનાં હર ખૂણે પહોંચાય, મારે એ ય જોવાનું હતું