કાવ્યમય ભારતના પ્રવાસે
કાવ્યમય ભારતના પ્રવાસે
દિલ્લી
યમુના કલકલ કરતી વહે
ભારતની રાજધાની ત્યાં રહે !
કિલ્લો લાલ, દિવાને-ખાસ,
ચાંદની ચોક છે, એની પાસ !
કોલકાતા
કોલકાતા છે મહાનગર,
મહાપુરુષોનું એ છે ઘર !
સૂણજો બંગાળીનાં ગાન,
ખાજો રસગુલ્લાં ને પાન !
મુંબઈ
મુંબઈ છે અલબેલું શહેરું,
કુદરતની છે પાકી મહેર !
કરજો ચોપાટીની સહેલ,
સામે મરિન ડ્રાઇવના મહેલ !
બોધગયા
બોધગયામાં તપથી શુદ્ધ,
ગૌતમ પૂર્ણ થયા’તા બુદ્ધ !
બધા ધર્મ પર રાખો પ્રેમ,
બધા જીવોનું ઈચ્છો ક્ષેમ !
કાશી
કાશીપુરી છે તીર્થ મહાન,
યુગ યુગનું એ ધર્મસ્થાન !
ગંગાનો પથરાયો પટ,
સાધુ-સંતોના ત્યાં મઠ !
અલાહાબાદ
અલાહાબાદની શોભા ઓર,
મુગટમાં મોતીનો મોર !
યમુના-ગંગા સંગમ થાય,
જ્ઞાન-ભક્તિ બે ભેગાં થાય !
જગન્નાથપુરી
સાગરકાંઠે સુંદર ગામ,
જગન્નાથપુરી છે એનું નામ !
રથયાત્રા એની પ્રખ્યાત,
ભક્તિનું દર્શન ત્યાં સાક્ષાત !
જયપુર
ગુલાબી રંગનાં બધાં મકાન,
એનું નામ છે જયપુર ગામ !
વચમાં ઊભો હવા-મહાલ,
એની શોભા ઝાકઝમાળ !