હૈયું પ્રેમતણું છે પ્યાસી

હૈયું પ્રેમ તણું છે પ્યાસી.

નેન નીરખવા રૂપ તમારું નિશદિન રહે ઉદાસી ... હૈયું.

ફરી વળ્યો હું પ્રેમ નશામાં બદરીકાશ્રમ કાશી,

રામેશ્વર ને પુરી દ્વારિકા, વિશ્વ તણા ઓ વાસી ... હૈયું.

સાગર સરિતા નભ પર્વતમાં એક તમે જ વિલાસી,

વાસ કરો છો, જોવા તમને ઝંખું છું, રસરાશિ ! ... હૈયું.

જગના વિષયે મન ના લાગે મારું અમૃત-પ્યાસી,

શ્વાસ સદા સેવે છે તમને, સેવે જેવી દાસી ... હૈયું.

રૂપ તમારું જોવા ‘પાગલ’ હું દુનિયાનો વાસી,

શાંત તેજનો પુંજ લઇને સામે રહો પ્રકાશી ! ... હૈયું.