હાંસિયામાં
હાંસિયામાં
1 min
13.8K
પત્ર લખવા જ્યાં જઉં ત્યાં ઘાસ ઊગે હાંસિયામાં,
તૃણ મુલાયમ લાગણીથી હાથ ચૂમે હાંસિયામાં.
ઘાસ ઝાકળ નામ-સરનામે સતત એવું લખાવે
કે વરસવા આવી મબલખ મૂળ ટહુકે હાંસિયામાં.
વૃક્ષનાં નવસંસ્કરણનો જ્યાં જરી સંકલ્પ પ્રગટ્યો,
એકસાથે રુંવે-રુંવે પાંદ ફૂટે હાંસિયામાં.
અક્ષરો રંગીન સઘળા ત્યારથી જોવા મળ્યા છે,
જ્યારથી આવી વસી તું ફૂલ રૂપે હાંસિયામાં.
ઝીણું-ઝીણું કાંતવામાં મીણ માફક ઓગળ્યા તો
આંખ આપોઆપ સઘળો વ્યાપ જુએ હાંસિયામાં.