ગુલાલ

પરમ સાથે પ્રીત શ્યામ

અંગ અંગ રંગ તું પ્રીતનો ગુલાલ લઈ

વાસંતી વાયરો વાયો એ ખયાલ લઈ,

ખરી જાય સઘળું તો કેસુડો ખીલશે

પાનખર આવી વનમાં એ ચાલ લઈ

અંગ અંગ રંગ તું પ્રીતનો ગુલાલ લઈ,

પલળી પળો જયારે રંગ કેરાં રસમાં

કેસરિયું મન મારું નાચ્યું એ માલ લઈ

અંગ અંગ રંગ તું પ્રીતનો ગુલાલ લઈ,

તન રંગાયુ, મન રંગાયુ તારા ગુલાલે

છલકાયું બેડલું રંગનો એ ફાલ લઈ

અંગ અંગ રંગ તું પ્રીતનો ગુલાલ લઈ,

જબરો તું જીવણ ખેંચે છે જીવને

ભોળાં તારા સ્મિતની એ જાલ લઈ

અંગ અંગ રંગ તું પ્રીતનો ગુલાલ લઈ,

ફાગણ ફોર્યાના શેરડાં જો ફૂટ્યાં છે

જાઉં કેમ ઘેર હવે લાલ આ ગાલ લઈ

અંગ અંગ રંગ તું પ્રીતનો ગુલાલ લઈ.