દિલમાં દીવો કરો

દિલમાં દીવો કરો રે દીવો કરો, 

કૂડા કામ ક્રોધને પરહરો રે ... દિલમાં દીવો કરો

દયા દીવેલ પ્રેમ પરણાયું લાવો,

માંહી સુરતાની દીવેટ બનાવો;

મહીં બ્રહ્મઅગ્નિ પ્રગટાવો રે ... દિલમાં દીવો કરો

સાચા દિલનો દીવો જ્યારે થાશે,

ત્યારે અંધારુ મટી જાશે;

પછી બ્રહ્મલોક તો ઓળખાશે રે .... દિલમાં દીવો કરો

દીવો અણભે પ્રગટે એવો,

ટાળે તિમિરના જેવો;

એને નેણે તો નીરખીને લેવો રે ... દિલમાં દીવો કરો

દાસ રણછોડે ઘર સંભાળ્યું,

જડી કૂંચી ને ઊઘડ્યું તાળું;

થયું ભોમંડળમાં અજવાળું રે ... દિલમાં દીવો કરો