અહંકારને ટાળ, સાધક,

અહંકારને ટાળ, સાધક, અહંકારને ટાળ !

નમ્ર બની જા, પ્રેમ-દયાને નિત્ય હૃદયમાં ધાર;

અસારને છોડીને ભાઇ, અપનાવી લે સાર ... સાધક.

સંતજનોનો સંગ કરી લે, સેવાનું વ્રત પાળ;

મદ ને માન ગુમાન મૂકી દે, મમતા બીજી માર... સાધક.

કામક્રોધ તિરસ્કાર છે મોટા, સાવધ બની સંભાળ;

નિંદા-સ્તુતિથી દૂર રહીને, તારો કર વિસ્તાર ... સાધક.

પ્રેમપંથનો પાર્થ બની જા, હૈયું હેતે હાર;

જ્ઞાનયોગની મદદ લઇને તિમિર હૃદયનું ટાળ ... સાધક.

અહંકાર કંટક છે એવો, સંત વચનનો સાર,

‘પાગલ’ પ્રેમલ મૃદુલ બની જા, કરવા ભવને પાર...સાધક.