આપજો આપજો સારું સઘળું

આપજો આપજો સારું સઘળું મને,

હે પ્રભુ, આજ આખા દિવસમાં;

બાળ ગણી વ્હાલ મારા ઉપર આણજો,

જેથી હું રહું બધો દિવસ સુખમાં.

આપજો આપજો સદગુણો આપજો,

આપજો વળી બહુ શુભ વિચારો;

આપજો આપજો આપની ભક્તિને,

આપજો વળી મને સંગ સારો.

આપજો આપજો મીઠી વાણી મને,

રાખજો મારું મન ખૂબ રાજી;

સૌનું હું કામ કરું એવું બળ આપજો,

સૌની સેવા કરું, જેથી ઝાઝી.

સૌથી બહુ આપજો આપ પ્રભુની કૃપા,

જેથી મળશે મને જે હું માગું;

માગ્યું નથી સારું જે તેહ પણ આપજો,

એટલું બોલી હું પાય લાગું.