કોઈ તો મનાવો ભાઈ રે

મારા આ મનડાને કોઈ તો મનાવો ભાઈ રે;
મોહ માયામાંથી કોઈ તો ઊગારો ભાઈ રે.

થાક લાગ્યો છે હવે ભાડાના આ આવાસમાં,
ક્યાંથી આવ્યો છું હું અસલી ઘર બતાવો ભાઈ રે.

વેદના ઊપડી છે પારાવાર, તેડાવો હવે-
વૈદડા, વાગ્યા ઉપર ઓષડ લગાવો ભાઈ રે.

બહુ કરી લીધી સફર આ કિંમતી ખોખા મહીં;
થાક મારા માયલાનો કોઈ ઉતારો ભાઈ રે.

ડૂબવા લાગ્યો છે માયાસાગરે આ જીવડો;
આરે ભવસાગરમહીંથી કોઈ તારો ભાઈ રે.

સદગુરુ સાચા મળીયા 'ને 'વિજય' બોલ્યા પછી,
નહિ મળે પાછો આ જનમારો, સુધારો ભાઈ રે.