ଉପାଧି

ଯୌବନର ରଜ୍ଜୁ

ଘଷିଘଷି ସରିଗଲା ପରେ,

ସୌନ୍ଦର୍ଯ୍ୟର ତ୍ଵଚା

ଅକାଳେ ଝଡିଗଲା ପରେ ,

ବାକି ବା’ କ’ଣ ଅଛି?

ପୁରୁଣା ତାଳ ପୋଥିରୁ

ଓଲଟାଏ,

ସେ ଭଙ୍ଗା-ଅଯୋଡ଼ା

ସମ୍ପର୍କର ଅପ୍ରୀତିକର କଥା ସବୁ,

ଅପରିଷ୍କାର ଫୋଟ ଫ୍ରେମ୍ ର

କୁହୁଡ଼ିଆ ଦ୍ଵନ୍ଦ ସବୁକୁ

ପୁଣି ପୋଛିବାକୁ ପ୍ରୟାସକରେ

ପାରିହୋଇ ନିର୍ଲଜତାର

ସବୁବନ୍ଧ ।

ଜାଣିପାରେନି କାହାପାଇଁ

ତା’ର ଏ ପ୍ରୟତ୍ନ !

ଏହି ଉପାଧି - ‘ମି-ଠୁ’

ତା’ ପ୍ରେମର, ନା’ ପ୍ରତାରଣାର

ତା’ ଅବିଶ୍ଵାସର,

ନା’ ଜଳାଞ୍ଜଳିରେ ପାଇଥିବା

ସଫଳତାର ?

ମୁଁ ଯାହା ଜାଣେ

ପ୍ରେମପାଇଁ ସବୁ ନାଟ

ପ୍ରେମପାଇଁ ଏଠିସେଠି ହାଟ

ପ୍ରେମପାଇଁ ସମସ୍ତେ ଏକ

ଫେଣ୍ଟାଫେଣ୍ଟି ରୂପ॥