Library
ଶ୍ରୀନୃସିଂହ ଜୟନ୍ତୀ
ଶ୍ରୀନୃସିଂହ ଜୟନ୍ତୀ
ଶ୍ରୀନୃସିଂହଙ୍କ ଜନ୍ମନୀତି ପାଳନ
ବିଧି ବଡଦେଉଳ ରେ
ବୈଶାଖ ଶୁକ୍ଳ ଚତୁର୍ଦ୍ଦଶୀ ତିଥିରେ
ପୂର୍ଣ୍ଣ ବିଧି ବିଧାନ ରେ
ଶ୍ରୀଜଗନ୍ନାଥ ଅବତାରୀ ଠାକୁର
ତାଙ୍କ ଠାରୁ ଅବତାର
ଆବିର୍ଭୁତ ପରେ ଲୀଳା ବିସ୍ତାରିତ
ପୁନଶ୍ଚ ଲୀନ ତହିଁର
ଚତୁର୍ଥ ଅବତାର ଭାବେ ମାନ୍ୟତା
ନୃସିଂହଙ୍କ ଅବତାର
ଅବତାର ଆଢ଼ୁଆଳେ ଭକ୍ତ ରକ୍ଷା
ପୁଣି ରାକ୍ଷସ ସଂହାର
ଭକ୍ତ ପ୍ରହଲ୍ଲାଦ କଥାର ବର୍ଣ୍ଣନା
ଅଛି ପୁରାଣ ପୃଷ୍ଠାରେ
ଭକ୍ତ ନିର୍ଯାତନା ଜାଣି ଆବିର୍ଭାବ
ପ୍ରଭୁ ନୃସିଂହ ରୂପରେ
ହିରଣ୍ୟ କଶ୍ୟପ ରାକ୍ଷସର ଉକ୍ତି
ଥିଲା ପ୍ରହଲ୍ଲାଦ ପ୍ରତି
ହରି ଯଦି ସର୍ବବ୍ୟାପୀ ଖମ୍ବ ମଧ୍ୟେ
ଉଭା ହୁଅନ୍ତୁ ସମ୍ପ୍ରତି
ସର୍ବବ୍ୟାପୀ ପରଂବ୍ରହ୍ମ ହେଲେ ଉଭା
ସେଇ ନିର୍ଦ୍ଦିଷ୍ଟ ଖମ୍ବ ରେ
ଅଧା ନର ଅଧା ସିଂହ ଉଗ୍ର ରୂପେ
ପୁଣି ସର୍ବ ସମ୍ମୁଖରେ
ନଖ ଦ୍ଵାରା ଚିରି ରାକ୍ଷସ ଶରୀର
ବଧ ହେଲା ସେହି ଠାରେ
ଅଜ୍ଞତା ବିନାଶ ପରେ ଆତ୍ମ ଜ୍ଞାନ
ପ୍ରକାଶ ହେଲା ଧରାରେ
ବୈଶାଖ ଶୁକ୍ଳ ଚତୁର୍ଦ୍ଦଶୀ ତିଥିରେ
ଯେଣୁ ନୃସିଂହ ସମ୍ଭୂତ
ସେହି ତିଥି ନୃସିଂହ ଜୟନ୍ତୀ ରୂପେ
ଶ୍ରୀମନ୍ଦିରେ ବି ପାଳିତ
ଉଗ୍ର ନୃସିଂହ କ୍ରମେ ଶାନ୍ତ ନୃସିଂହ
ଦୁଇ ରୂପରେ ପୂଜନ
ନର-ସିଂହ ମିଶ୍ରଣରେ ନରସିଂହ
କ୍ଷର ଅକ୍ଷର ମିଳନ
ଶ୍ରୀନୃସିଂହ ପୁରୁଷୋତ୍ତମ କ୍ଷେତ୍ରରେ
ଆଦ୍ୟ ପ୍ରତିଷ୍ଠିତ ମୂର୍ତ୍ତି
ଶ୍ରୀମନ୍ଦିରେ ବିଜେ ଭିନ୍ନ ଭିନ୍ନ ସ୍ଥଳେ
ଭିନ୍ନ ନାମରେ ସମ୍ପ୍ରତି
ଶ୍ରୀମନ୍ଦିରେ ପ୍ରତି ହୋମାଦି କର୍ମରେ
ମୁଖ୍ୟ ଦେବ ହିଁ ନୃସିଂହ
ନୃସିଂହ ମନ୍ତ୍ରରେ ନ୍ୟାସ ସହ ଦାରୁ
ପ୍ରତିଷ୍ଠା ଦାରୁ ବିଗ୍ରହ
ବୈଶାଖ ଶୁକ୍ଳ ଚତୁର୍ଦ୍ଦଶୀ ତିଥିରେ
ଯାତ ଭୋଗ ଶେଷ ପରେ
ଚନ୍ଦନ କୁ ବିଜେ କରନ୍ତି ବିଗ୍ରହ
ମଧ୍ୟାହ୍ନ ଧୂପ ତା' ପରେ
ଶ୍ରୀଅଙ୍ଗରୁ ଆଜ୍ଞାମାଳ ଯାଇଥାଏ
ନୃସିଂହ ଠାକୁର ପ୍ରତି
ଘଣ୍ଟ ଛତା କାହାଳୀ ର ଧାରେ ଧାରେ
ପାଳିଆ ପଣ୍ଡା ଗମନ୍ତି
ସିଂହଦ୍ୱାର ଓ ଦୋଳ ମଣ୍ଡପ ସାହି
ଅତିକ୍ରମ ହେଲା ପରେ
ଚକ୍ର ନାରାୟଣ ମନ୍ଦିରକୁ ଯାତ୍ରା
ହୁଏ ବିଧି ସଙ୍ଗତରେ
ଆଜ୍ଞାମାଳ ଲାଗି ହୁଏ ବିଧାନ ରେ
ଚକ୍ର ନାରାୟଣ ଅଙ୍ଗେ
ପରେ ମଇଲମ ସହିତ ଆଳତି
ମହାପ୍ରଭୁଙ୍କୁ ସରାଗେ
ଠାକୁରଙ୍କ ପଞ୍ଚାମୃତ ମହାସ୍ନାନ
ବିଧି ବି ତିନି-ବାଡ଼ ରେ
ଏହି ପରି ନୃସିଂହଙ୍କ ଜନ୍ମ ନୀତି
ପାଳନ ହୁଏ ଶ୍ରୀମନ୍ଦିରେ
ଶ୍ରୀଜଗନ୍ନାଥ ହିଁ ସାକ୍ଷାତ୍ ନୃସିଂହ
ପୁରାଣ ପୋଥି ପୃଷ୍ଠାରେ
ନମଇ ନୃସିଂହ ଚରଣ ବନ୍ଦନା
ଭାଗବତ ଆରମ୍ଭରେ ।।
