ଶେଷ ଅନୁରୋଧ ରହିଲା ମୋର
ଶେଷ ଅନୁରୋଧ ରହିଲା ମୋର
ସମସ୍ତେ କୁହନ୍ତି "ତୋ"ଶରଣ ବିନା
ଜୀବନରେ ମୁକ୍ତି ନାହିଁ
ହେଲେ ମୋ ହୃଦୟେ ଅଭିମାନ ଯେତେ
"ତୁ" ଭରି ଦେଇଛୁରେ କଳା କହ୍ନେଇ ।
ଅଭିମାନ ମୋର ଦୂର କରିଦେ ରେ
ଆପଣାର ଭାବି ଥରେ
ଯାହା ଦେଇ ଥିଲୁ ସବୁତ ନେଇଛୁ
"ତୋ" ବିନା ଆଉ ମୋ କିଏ ଅଛିରେ ।
ବାହୁ ପ୍ରସାରିଣ ଥରେ ତୁ'ଡାକିଲେ
ଅଭିମାନ ସବୁ ଯିବି ମୁଁ ଭୁଲି
ଜୀବନର ମୋହ ଛାଡି ସାରିଲିଣି
ଲୋଡା ମୋର ଖାଲି ସରଧା ବାଲି ।
ବର୍ଷ ବର୍ଷ ହେଲା ଦେଖିନି ତୋତେ ମୁଁ
ଅଭିମାନ କେତେ ରହିଛି ସତେ
ସରଧା ବାଲିକି କରିଛି ପ୍ରତୀକ୍ଷା
କୋଳେଇ ନେବୁ ତୁ' କାଳିଆ ମୋତେ ।
ଫର ଫର ହୋଇ ଉଡୁଥିବ ନେତ
ସେ ନେତରେ ଥିବୁ ତୁ' ଜଗନ୍ନାଥ
ଦୂରରୁ ହେଲେ ବି ସେ ନେତ ଦେଖିଣ
ମୁକ୍ତି ପାଇଯିବ ଏ ଚର୍ମ ନେତ୍ର ।
ଜଳୁଥିବ ଜୁଇ ହୁ ହୁ ହୋଇ
ନେତ୍ର ଦେଖୁଥିବ ମୁରତୀ ତୋର
ବାହୁକୁ ମେଲାଇ କୋଳେଇ ନେବୁରେ
ଶେଷ ଅନୁରୋଧ ରହିଲା ମୋର ।