ପୀରତି ପଥ

ପୀରତିର ପଥ ଭାରି ଖସଡା ଲୋ'

ଦେଖି ଚାହିଁ ଚାଲୁଥିବୁ

ନିଘା ନକରିଲେ ଗୋଡ ଖସିଯିବ

ଏକଥା ମନେ ରଖିବୁ ।

ପ୍ରୀତି ମଧୁରସ ଯେ' ଥରେ ପିଇଛି

ପାଇଛି ସେ ତା'ର ସ୍ବାଦ

ପ୍ରୀତି ବର୍ଣ୍ଣବୋଧ ବ୍ୟତିକ୍ରମ ହେଲେ

ମନେ ଭରେ ଅବସାଦ ।

ଫଗୁଣର ଫଗୁ ରଙ୍ଗ ବୋଳି ଦେହେ

ପ୍ରୀତିଭାଷା କହିଯାଏ

ମଳୟ ପବନେ ସୁରଭିତ ମନେ

ପ୍ରୀତିର ସଙ୍ଗୀତ ଗାଏ ।

ଚୋରା ପୀରତିର ମଧୁମଧୁ ବାସ୍ନା

ମହମହ ପୁଣି ବାସେ

ପୀରତି ନଈରେ ସ୍ନାନ ଯେ' କରିଛି

ପ୍ରୀତି ରସରଙ୍ଗେ ରସେ ।

ପହିଲି ଶ୍ରାବଣ ବାରିଧାରା ସମ

ବରଷେ ପ୍ରୀତିର ବର୍ଷା

ଯେ' ଭିଜିଛି କେବେ ପ୍ରୀତି ବରଷାରେ

ଭିଜାଏ ପ୍ରୀତିର ନିଶା ।

ପ୍ରୀତି ପରିଭାଷା ସହଜ ନୁହଁ ଲୋ'

ଏକଥା ମନେ ରଖିଥା

ବାସ୍ତବତା ଯଦି ନଥାଏ ପ୍ରୀତିରେ

ତନୁମନେ ଭରେ ବ୍ୟଥା ।

ଶ୍ରୀ ବିଦ୍ୟାଧର ସେଠୀ

ବ୍ୟକ୍ତିଗତ ସହାୟକ

ଜିଲ୍ଲା ପରିଷଦ କାର୍ଯ୍ୟାଳୟ, ବାଲେଶ୍ବର

ଓଡିଶା - ୭୫୬୦୦୧