ନିତି ନୂଆ ନୂଆ ବେଶ

ଜୟଜୟ ଜଗନ୍ନାଥ ଜଗତ ସାଇଁ

ପତିତ ପାବନ ପ୍ରଭୁ କଳା ଗୋସାଇଁ।

ଚକାନୟନରେ ପ୍ରଭୁ ସବୁ ଦେଖୁଛ

ଦୁଃଖୀଜନ ମନକଥା ନିତି ବୁଝୁଛ ।

କଣାଏ କରୁଣା ତୁମ ପାଇବା ପାଇଁ

କାହିଁ କେତେ ଦୂରୁ ଭକ୍ତ ଆସନ୍ତି ଧାଇଁ ।

ଦୀପଟିଏ ଜାଳି ତୁମ ନାମ ଗାଆନ୍ତି

ବାହୁ ଟେକି ମହାନନ୍ଦେ ନାଚି ବୁଲନ୍ତି ।

ଭାବ ଭକ୍ତି ଉପାସନା ମଧୁର ପୂଜା

ରାଜା ତ ରାଜା ଆମ କାଳିଆ ରାଜା ।

ଚୁଆ ଚନ୍ଦନ ତୁଳସୀ ଦୟଣାମାଳ

ମହମହ ମହକଇ ସାରା ଦେଉଳ ।

ଲୀଳାମୟ ତୁମେ ତୁମ ଲୀଳା ଅପାର 

ମାନବୀୟ ଲିଳା ତୁମ ଭାରି ସୁନ୍ଦର ।

ପ୍ରଭାତରୁ ଉଠ ପୁଣି ରାତିରେ ଶୁଅ

ଧୂପ ଅବକାଶ କେତେ ବେଶ ଯେ ହୁଅ ।

ନିତ୍ୟ ବେଶ ପୁଣି କେତେ ପାର୍ବଣ ବେଶ

ପାପ ଆଖି ଦେଖି ଆମ ହୁଅଇ ତୋଷ ।

ମହାଜନ ପୁଷ୍ପାଳକ ବେଶ କରନ୍ତି

ବସ୍ତ୍ର ଅଳଙ୍କାରେ ସଜ କରନ୍ତି.....

ରାତି ନପାହୁଣୁ ବଡ ଦେଉଳ ଖୋଲେ

ମଣିମା ମଣିମା ଡାକ ଦିଗ ଉଛୁଳେ ।

ମଙ୍ଗଳ ଆଳତୀ ଭକ୍ତ ଦେଖିବା ପାଇଁ

ଭାବ ଭକତିରେ ସବୁ ଥାଆନ୍ତି ଚାହିଁ ।

ଆଳତୀ ସରିଲେ ରାତି ପୁରୁଣା ବେଶ

ଉଲାଗି କରନ୍ତି ପୁଷ୍ପାଳକ ସେବକ ।

ତଡପ ଉତ୍ତରୀ ବେଶ ପ୍ରଭୁ ହୁଅନ୍ତି

ଧଳାରଙ୍ଗ ସୂତା ଲୁଗା ପ୍ରଭୁ ପିନ୍ଧନ୍ତି ।

ତଡପ ଉତ୍ତରୀ ବେଶ ହୋଇଲେ ଶେଷ

ଚତୁର୍ଦ୍ଧା ମୂରତିଙ୍କ ହୁଏ ଅବକାଶ ।

ମୁଖ ପ୍ରକ୍ଷାଳନ ନିତ୍ୟ ଦନ୍ତ ମଞ୍ଜନ

ଦରପଣ ସମ୍ମୁଖରେ ବିମ୍ବ ସ୍ନାହାନ ।

ଅବକାଶ ନିତିପରେ ହୁଏ ମଇଲମ

ପ୍ରଭୁ କରନ୍ତି ପାଟ ବସ୍ତ୍ର ପରିଧାନ ।

ଚକାବଇଠିରେ ଚକାପାରି ବସନ୍ତି

ଭକତଙ୍କ ଡାକ କାନଡେରି ଶୁଣନ୍ତି ।

ଫୁଲ ତୁଳସୀ ଦୟଣା ଗଳାରେ ଝୁଲେ

ଆଖି ଲାଖିଯାଏ ସେହି ରୂପ ଦେଖିଲେ ।

ଏମିତି ସକାଳେ ନିତି ବେଶ ହୁଅନ୍ତି

ଦୟାମୟ ପ୍ରଭୁ ଚତୁର୍ଦ୍ଧା ମୂର୍ତ୍ତି ....

ନିତ୍ୟବେଶ ମଧ୍ୟେ ସାର ବଡସି°ହାର

ବାରଲାଗି ପାଟ ସାଥେ ଫୁଲ ସମ୍ଭାର।

ରଜନୀଗନ୍ଧା ରଙ୍ଗଣୀ ସେବତୀ ଯୁଇ

ଗୋଲାପ ଅଶୋକ ଚମ୍ପା କେତକୀ ଜାଇ।

କଦମ୍ବ ବଉଳ କୁନ୍ଦ ଗେଣ୍ଡୁ ନିଆଳି

ସୁଗନ୍ଧରାଜ ମାଳତୀ ଗଙ୍ଗଶିଉଳି ।

ତୁଳସୀ ଦୟଣା ମାଳ ମରୁଆ ଫୁଲ

ଫୁଲେ ଫୁଲେ ଫୁଲରଙ୍କା କି ଝଲମଲ ।

ସନ୍ଧ୍ୟା ଧୂପ ପ୍ରଭୁଙ୍କର ହୋଇଲେ ଶେଷ

ଆରମ୍ଭ ହୁଅଇ ବଡସି°ହାର ବେଶ ।

ମଠ ମନ୍ଦିର ରୁ ସବୁ ଫୁଲ ଆସନ୍ତି

ପୁଷ୍ପାଳକମାନେ ମିଶି ବେଶ କରନ୍ତି ।

ଫୁଲର କରପଲ୍ଲବ କର୍ଣ୍ଣ କୁଣ୍ଡଳ

ଫୁଲର ଚନ୍ଦ୍ରିକା ପୁଣି ଅଧର ମାଳ ।

ବକ୍ଷରେ ପଦକ ନାକୁଆସି ନାକରେ

ନାକରେ ନାକ ଗୁଣା ଅଳକା ମଥାରେ ।

ବଡସି°ହାର ବେଶରେ ଚତୁର୍ଦ୍ଧା ମୂର୍ତ୍ତି

ରତ୍ନ ପଲଙ୍କରେ ନିତି ପହୁଡି ଥାନ୍ତି ।

ଏମିତି ପ୍ରଭୁଙ୍କର ନିତିଦିନ ବେଶ

ପାର୍ବଣ ବେଶ ଲିଳା ଅଶେଷ ....

ସ୍ନାନ ପୂର୍ଣ୍ଣିମା ପ୍ରଭୁଙ୍କ ଜନମ ଦିନ

ସେଦିନ ପ୍ରଭୁ କରନ୍ତି ପ୍ରତ୍ୟକ୍ଷ ସ୍ନାନ ।

ସ୍ନାହାନ ବେଦୀରେ ପ୍ରଭୁ ବିଜେ କରନ୍ତି

ସୁନାକୂଅ ପାଣିରେ ତ ସ୍ନାନ କରନ୍ତି ।

ସ୍ନାନ ପରେ ପ୍ରଭୁଙ୍କ ଗଣପତି ବେଶ

ସତେକି ହାତୀ ରୂପେ ପ୍ରଭୁ ପରକାଶ ।

ସୁନାବେଶ ପ୍ରଭୁଙ୍କ ବାହୁଡା ରଥରେ

ତାଳୁରୁ ତଳିପା ଶୋଭେ ସୁନାଳଙ୍କାରେ।

ଅଧାଗଢା ଦିଅଁଙ୍କର ପୂର୍ଣ୍ଣ ସ୍ୱରୂପ

ମନ ମୋହି ନିଅଇ ପୂର୍ଣ୍ଣବ୍ରହ୍ମ ରୂପ ।

ପବିତ୍ର ଦଶରା ବିଜୟା ଦଶମୀ

କାର୍ତ୍ତିକ ପୌଷ ପୁଣି ଦୋଳ ପୂର୍ଣ୍ଣମୀ 

ପାଞ୍ଚଥର ପ୍ରଭୁ ସୁନା ବେଶ ହୁଅନ୍ତି

ରାଜାଧିରାଜ ରୂପେ ଦର୍ଶନ ଦିଅନ୍ତି ।

ଭାଦ୍ରବର କୃଷ୍ଣ ପକ୍ଷ ଦଶମୀ ଦିନ

ପ୍ରଭୁଙ୍କର ବଣଭୋଜି ବେଶ ସେଦିନ ।

ରୁପା ପିଙ୍ଗଣରେ ଶର ହାତେ ଧରନ୍ତି

ଆନ ହସ୍ତେ ଲଉଡି ବାଡି ଧରିଥାନ୍ତି ।

ଲାଗନ୍ତି ଯେମିତି ସେ ବଳରାମ କୃଷ୍ଣ

ବଣଭୋଜି ପାଇଁ କରନ୍ତି ଗମନ...

ଭାଦ୍ର କୃଷ୍ଣ ଏକାଦଶୀ ରେ ନାରାୟଣ

କାଳନ୍ଦୀରେ କରନ୍ତି କାଳୀୟ ଦଳନ ।

ପରଦିନ ଦ୍ୱାଦଶୀ ବଳଭଦ୍ର ଯତି

ପ୍ରଳମ୍ବାଶୁର ବଧ ବେଶ ସେ ହୁଅନ୍ତି ।

ଭାଦ୍ର କୃଷ୍ଣ ତ୍ରୟୋଦଶୀ ପବିତ୍ର ତିଥି

ଦୁଇଭାଇ ରାମକୃଷ୍ଣ ବେଶ ହୁଅନ୍ତି ।

ଭାଦ୍ରବ ଶୁକ୍ଳପକ୍ଷ ଦ୍ବାଦଶୀ ଯେ ଦିନ

ପ୍ରଭୁ ବାମନଙ୍କର ଜନମ ସେଦିନ ।

ସେହି ପବିତ୍ର ତିଥିରେ କଳା ଠାକୁର

ବାମନ ବେଶ ହୋଇ ଦିଶନ୍ତି ସୁନ୍ଦର ।

ଆଶ୍ବିନ ମାସ ଶେଷରୁ କାର୍ତ୍ତିକ ଶେଷ

ମହାପ୍ରଭୁଙ୍କ ରାଈ ଦାମୋଦର ବେଶ ।

ନିତି ଆଳତୀ ଅବକାଶ ହେଲେ ଶେଷ

ପ୍ରଭୁ ହୋଇଥାନ୍ତି ଏହି ଅପୂର୍ବ ବେଶ ।

କାର୍ତ୍ତିକ ମାସ ଶୁକ୍ଳ ଏକାଦଶୀ ଦିନ

ମହାପ୍ରଭୁଙ୍କ ବେଶ ଲକ୍ଷ୍ମୀ ନାରାୟଣ ।

ଦ୍ବାଦଶୀ ରେ ପ୍ରଭୁଙ୍କ ବାଙ୍କଚୂଡ ବେଶ

ତ୍ରୟୋଦଶୀ ରେ ତ୍ରିବିକ୍ରମ ଜଗଦୀଶ ।

ଚତୁର୍ଦ୍ଦଶୀ ରେ ଲକ୍ଷ୍ମୀ ନୃସିଂହ ବେଶ

ମହକେ ଚଉଦିଗ ଫୁଲ ବାସ ...

ମାର୍ଗଶିରେ ପ୍ରଭୁ ଶ୍ରାଦ୍ଧ ବେଶ ହୁଅନ୍ତି

ପିତୃପୁରୁଷଙ୍କୁ ତାଙ୍କ ଶ୍ରାଦ୍ଧ ଦିଅନ୍ତି ।

ପଞ୍ଚୁକ ପଡଇ ଯେବେ ଛଅ ଦିନଟି

ନାଗାର୍ଜୁନ ବେଶେ ପ୍ରଭୁ ସଜ ହୁଅନ୍ତି ।

ମାର୍ଗଶିର ଠାରୁ ଶୀତ ଆରମ୍ଭ ହୁଏ

ଓଢଣ ଷଷ୍ଠୀ ରୁ ଘୋଡ ଲାଗିଯେ ହୁଏ ।

ସାତଦିନ ସାତରଙ୍ଗ ଶୀତ ବସ୍ତ୍ର ରେ

ଘୋଡ ଲାଗିହୁଏ ପ୍ରଭୁଙ୍କ ଶ୍ରୀ ଅଙ୍ଗରେ ।

ରବିବାର ନାଲି ରଙ୍ଗ ବସ୍ତ୍ର ଚହଟ

ସୋମବାରରେ ଘୋଡ ଧଳା କଳା ଛିଟ।

ମଙ୍ଗଳବାର ଦିନ ପାଞ୍ଚ ରଙ୍ଗ ମିଶା

ବୁଧବାର ନୀଳ ଗୁରୁ ସବୁଜ ଘଷା ।

ଶୁକ୍ରବାର ଧଳାରଙ୍ଗ ଘୋଡ ଲାଗଇ

ଶନିବାର ଦିନ କଳା ରଙ୍ଗେ ରଙ୍ଗେଇ ।

ଓଢଣ ଷଷ୍ଠୀ ରୁ ଯେ ସରସ୍ୱତୀ ପୂଜା

ଘୋଡଲାଗି ହୋଇ ପ୍ରଭୁ ପାଆନ୍ତି ପୂଜା ।

ଫଗୁ ଦଶମୀ ରୁ ଦୋଳ ପୂର୍ଣ୍ଣିମା ଯାଏ

ପ୍ରଭୁଙ୍କ ନିଇତି ଚାଚେରୀ ବେଶ ହୁଏ ।

ଦୋଳ ବିମାନ ରେ ବସି ଦୋଳ ଗୋବିନ୍ଦ

ଯାତ୍ରା କରିଥାନ୍ତି ହୋଇ ଆନନ୍ଦ....

ସନ୍ଥ ମନୋହର ଦାସ ଭକ୍ତିରେ ତୋଷ

ମାଘମାସେ ପ୍ରଭୁଙ୍କର ଏ ପଦ୍ମ ବେଶ।

ଶୀତଦିନେ ମିଳେନାହିଁ ପଦ୍ମ ଫୁଲଟି

ସୋଲ ପଦ୍ମ ଫୁଲେ ପ୍ରଭୁ ବେଶ ହୁଅନ୍ତି ।

ବଡଛତା ମଠରୁ ସୋଲ ଫୁଲ ଆସେ

ବେଶ ପରେ କ୍ଷୀରି ଭୋଗ ମହମହ ବାସେ।

ଗଜ ଉଦ୍ଧାରଣ ବେଶ ମାଘ ପୂର୍ଣ୍ଣିମା ରେ

ଏ ବେଶ ହୁଅନ୍ତି ମଧ୍ୟାହ୍ନ ଧୂପ ପରେ ।

ସରିଲେ ସନ୍ଧ୍ୟା ଆଳତୀ ସାହାଣ ମେଲା

ଦେଖିବାକୁ ଏହି ବେଶ ଭକତ ମେଳା ।

ଚନ୍ଦନ ଯାତ୍ରା ହୁଏ ବୟାଳିଶ ଦିନ

ପ୍ରତିଦିନ ଫୁଲେବେଶ ଚକାନୟନ ।

ଚନ୍ଦନ ବେଶ ନାମରେ ସେ ବେଶ କ୍ଷାତ

ଶଖି ଶଖା ମେଳେ ପ୍ରଭୁ ଖେଳନ୍ତି ଚାପ ।

ମକର ସଙ୍କ୍ରାନ୍ତି ଯାତ୍ରା ଉତ୍ତରାୟଣ

ମକର ଚୌରାଶି ବେଶେ ମନମୋହନ ।

ମଥାରେ ମକରଚୂଳ ଅପୂର୍ବ ଶୋଭା

ପ୍ରଭୁଙ୍କର ସବୁ ବେଶ କି ମନଲୋଭା ।

ସବୁ ବେଶ ତୁମ ପ୍ରଭୁ ଶରଧା ବୋଳା

ଶ୍ରଦ୍ଧା ରଖିଥିବ ହେ ଚକାଡୋଳା ...