ମୋ ଅଗଣାର ଖୁସି

ଈଶ୍ୱରଙ୍କ ର ତୁ' ଅଟୁ ବରଦାନ

ମୋ ଅଗଣାର ଖୁସି

ଜୀବନର ସବୁ ଦୁଃଖ ଭୁଲିଯାଏ

ତୁ'ଯେବେ ଦେଉ ହସି ।

ତୁ' ଚୁଲୁବୁଲି ମୁଁ ଡାକେ ତତେ ଗେହ୍ଲି

ତୋ'କଥାରୁ ପିୟୁଷ ଝରେ

ଝୁଣ୍ଟି ମୁଁ ପଡିଲେ ତୋ' ଆବା ଟିକକ

ସବୁ କ୍ଳେଶ ମୋର ହରେ ।

ଗେହ୍ଲି ଟି ତୁ' ମୋର ସବୁଠୁ ସୁନ୍ଦର

ନାମ ତୋ'ଦେଇଛି 'କୃଷ୍ଣା'

ତୁ'ବଡ ହୋଇ ନାଆଁ ମୋ ରଖିଲେ

ମେଣ୍ଟିଯିବ ମୋର ତୃଷ୍ଣା ।

ବଡ ମାନଙ୍କର କଥା ତୁ' ମାନିବୁ

ଅଝଟିଆ ହେବୁନାହିଁ

ମନଦେଇ ସଦା ପାଠ ତୁ ପଢିବୁ

ନିତି ଆଦର୍ଶ କୁ ନେଇ ।

ତୋତେ ନେଇ ଯେଉଁ ସପନ ଦେଖିଛି

ରଖିବୁ ତାହାର ମାନ

ଛୋଟଙ୍କୁ ଆଦର ବଡଙ୍କୁ ସମ୍ମାନ

କରୁଥିବୁ ନିତିଦିନ ।

ଇର୍ଷା, ଘୃଣା ସବୁ ମନରୁ ତେଜିବୁ

କୋଟିଏରେ ହେବୁ ଗୋଟିଏ

ପର ଉପକାରେ ଜୀବନ ଲାଗିଲେ

ଆତ୍ମା ପରା ଶାନ୍ତି ପାଏ ।

ଫୁଲେଇ ତୁ'ମୋର ପରକୁ ନିଜର

କରିବାର ଗୁଣ ଶିଖିବୁ

ଶାନ୍ତି, ମୈତ୍ରୀ ବାଣ୍ଟି ଦୁଃଖକୁ ସାଉଁଟି

ଏ ଧରାରେ ଯଶ ରଖିବୁ ।