ଲଙ୍କା ଗଛ
ଲଙ୍କା ଗଛ
ଅପେକ୍ଷାକର ,
ତଥାପି ଅନିର୍ଣ୍ଣୀତ ତୁମ ବଗିଚାରେ
ଯେଉଁଠି କୋଣ ଟିଏ ଆଦରି
ମୁଁ ଲଙ୍କା ଗଛ ହେବି ।
ଏ ଜନ୍ମରେ ତୁମକୁ କ'ଣ ଅବା ଦେଇଥାନ୍ତି
ଦେବାପାଇଁ ମୋର କ'ଣ ବା ଥିଲା ?
ପାଦେ ଭୂମି ଯେଉଁଠି ପଡିନି ମଣିଷ ପାଦଚିହ୍ନ,
ଗଣ୍ଡୂଷେ ତୀର୍ଥଜଳ,
କି ସ୍ବପ୍ନର ଆକାଶରୁ ଉଜ୍ଜ୍ବଳତମ ନିହାରୀକା,
କ'ଣ ଦେଇଥାନ୍ତି ? କ'ଣ ?
ମୋର ପାଦ ତଳେ ଇ ମାଟି ନଥିଲା
ମୋର ଛାଇ ଠୁ ଈଶ୍ୱର ଲୁଚୁଥିଲେ
ମୁଁ ବି ତ ସେ ଗଛ ଦେଖିନଥିଲି ଯାହାର ଡାଳରେ
ହଳଦୀ ବସନ୍ତ ଚିହ୍ନା ଗୀତଟେ ଗାଉଥିଲା ,
ମୁଁ ତ ସିସିଫସ୍ ପରି ତମାମ ଆୟୁଷ
କଟାଇଦେଲି ମରିଚୀକା ପଛରେ ।
ତେଣୁ ଥାଉ ।
ତୁମର ମେଘ ଖଣ୍ଡେ ,
ଦିଅଁଙ୍କ ଠାରେ ଶୁଦ୍ଧ ଘିଅର ଦୀପ ଯେତେ ,
କିଛି ଉତ୍ତର ଦେଉନଥିବା ଅଥଚ ସବୁ ପ୍ରଶ୍ନ ଶୁଣୁଥିବା
ଚିରକାଳ ରହସ୍ୟମୟ ତୁମ ନିଜ ପ୍ରତିବିମ୍ବ ,
ଦୁଃସ୍ବପ୍ନେ ଉତ୍ସନ୍ନ ରାତି ଯେତେ
ଥାଉ । ମୋ ଉପରେ ଉଧାର ଥାଉ ।
ମୁଁ କେଉଁ ନା କେଉଁ ଜନ୍ମରେ ଋତୁମ୍ଭର ହୋଇ
ଡେଇଁ ଯିବି ଭୂତ-ଭବିଷ୍ୟ- ବର୍ତ୍ତମାନ
ତୁମରି ବାଡ଼ିରେ ଇ ଲଙ୍କା ଗଛ ହେବି ।
ସାବଜା ସମ୍ଭାବନାଟିଏ ହୋଇ
ମୁଁ ହିଁ ଥର ଥର ଫଳୁଥିବି
ଆଉ ଏକ ଜନ୍ମ ଲାଗି
ତୁମ ସ୍ପର୍ଶ ଉଧାର ରଖି ... ।
**********
ଆଶୁତୋଷ ପ୍ରସାଦ ମଲ୍ଲିକ ।