ଆଜି ମୁଁ ସମୁଦ୍ର
ଆଜି ମୁଁ ସମୁଦ୍ର
ମୁଁ ମନରେ ଥାପିଛି ସମୁଦ୍ର ଆଜି
ମୋତେ କ'ଣ ଦେଉଛ ଦିଅ ।
ଅସରାଏ ଦୁଃଖ,
ଅକଳନ୍ତି ତିକ୍ତତା ,
ଈର୍ଷାର ପ୍ରଖର ସ୍ରୋତସ୍ଵତୀ ,
ପ୍ରତାରଣାର ଭୟଙ୍କର ଅନ୍ଧାର ,
ସ୍ଵାର୍ଥର ପଚା ଗନ୍ଧ ପାଣି ଧାର ,
ଯାହା ବି ଦଉଚ ଦିଅ
ମୋ ଆଁ ରେ ତୁମର ସବୁ ଦାନ
କଳେ ବି ନୁହେଁ ।
ମୋ ଆଡ଼କୁ ଆମଞ୍ଚିତ ଅଗ୍ନି ଶରକୁ
ଆଉ ମୋର ଭୟ ନାହିଁ
ଏବେ ମୁଁ ଗୋଟା ପଣେ ଲୁଣା ବାଲିଚର ।
ପାରିବ ଯଦି ଏବେ ଥରେ ମୋ କୂଳ କୁ ଆସି
ସେଇ ପୁରୁଣା ପ୍ରଶ୍ନ ନେଇ ।
ମୋ ଛାତି ସେପଟେ କ'ଣ ?
ଦେଶ , କ୍ଳେଶ ,ଦୋଷ ନା କେଉଁ ଛଦ୍ମବେଶ
ଉତ୍ତର ନ ପାଇଲେ ରଖିଯିବ ପଛେ
ଯେତେ ଅବଶୋଷ ।
ରଖିଥାଅ । ଯାହା ବି ରଖିଛ ମୋ ପାଇଁ ରଖିଥାଅ ।
ମୋ ପାଇଁ କଟୁ ଆଉ କ'ଣ ?
ଲୁହର ଲୁଣରେ ଲୁଣେଇ ଚାଲିଛି ମୋ ଦେହ ।
ତଥାପି ମୁଁ ମନରେ ଥାପିଛି ସମୁଦ୍ର ଆଜି
କଥା ଦେଉଛି ତୁମ ଠୁ ଯାହାବି ପାଇବି
ଫେରେଇବି ନିଶ୍ଚିତ ।
ତୁମର କାଣିଚାଏ ଆରୋପ ବି ।
ଅବଶ୍ୟ ଲୁହ ଶୋଧନ ପରେ
ପାଖୁଡାଏ ହସ ଭଳି
ତୁମରି ଓଠକୁ ... ।
****************ଆଶୁତୋଷ ପ୍ରସାଦ ମଲ୍ଲିକ