କରିବ ମୋ ଇଚ୍ଛା ପୂରଣ
କରିବ ମୋ ଇଚ୍ଛା ପୂରଣ
(ଛନ୍ଦ-କୌଶିକ)
ଆହେ ଦୟାମୟ ମଙ୍ଗଳ ଆଳୟ
ତୁମେ ସ୍ରଷ୍ଟା ସୃଷ୍ଟି କାରଣ
ତୁମ ଇଚ୍ଛା ବିନା ହଲେ ନାହିଁ ପତ୍ର
ସବୁ ତ ତୁମରି ଭିଆଣ
ଧରା ବୁକୁରେ
କୀଟଠୁ ମାନବ ପର୍ଯ୍ୟନ୍ତ
ଯେତେ ପଶୁପକ୍ଷୀ ବୃକ୍ଷଲତା ଆଦି
ତୁମ ଶ୍ରୀପୟରେ ଆଶ୍ରିତ ।
ଯାହା ପାଇଁ ଯାହା ଲୋଡ଼ା ପଡେ ତାହା
ଯାଚି ଦେଇଛ ମନ ଜାଣି
ଶ୍ରଦ୍ଧା ଭକ୍ତି ପ୍ରେମ କେଡ଼େ ଅନୁପମ
ଦେଇଛ ହୃଦକ୍ଷେତେ ବୁଣି
ତବ କରୁଣା
ଆଶିଷ ଲଭନ୍ତି ସକଳେ
ବିପଦେ ବିଷାଦେ ତୁମରି ଶ୍ରୀପଦେ
ଗୁହାରି ଜଣାନ୍ତି ବିକଳେ ।
କ୍ଷୟ ଧର୍ମ ଯେବେ ଜନ୍ମ ନେଇ ତେବେ
କରାଅ ଧର୍ମ ସଂସ୍ଥାପନା
ଅମର କୀରତି ଘୋଷେ ଏ ଜଗତି
ଶ୍ରୀମୁଖେ କରିଛ ବର୍ଣ୍ଣନା
ଗୀତା ଜ୍ଞାନରେ
ଚେତାଇ ଦେଇଛ ଚେତନେ
ଛାଡ଼ି ମନ୍ଦ କର୍ମ ପାଳି ନର ଧର୍ମ
ଉର୍ଦ୍ଧ୍ବରେତା ହେବା ଜୀବନେ ।
ଅଗତିର ଗତି ଆହେ ଲକ୍ଷ୍ମୀପତି
କୋଟି ପ୍ରଣତି ଶ୍ରୀଚରଣେ
ବିନତି ଏତିକି ନ ପଡ଼ିବି ଥକି
କର୍ମମୟ ଏହି ଜୀବନେ
ଧରା ବୁକୁରେ
ଜୀଇଁ ରହିବି ଯେତେଦିନ
ଜଗତର ହିତ ଚିନ୍ତୁଥିବି ନିତ୍ୟ
କରିବ ମୋ ଇଚ୍ଛା ପୂରଣ ।।