ଜୀବନ ବହିର ତେପନ ପୃଷ୍ଠା

ଜୀବନର ଅଙ୍କ କଷୁ କଷୁ ଆଜି

ସରିଲା ତେପନ ପୃଷ୍ଠା

ଜାଣି ହେଲାନାହିଁ ଜୀବନର ମାନେ

ଅଧା ହେଲା କାହାଣୀଟା ।

ଯେତେ ଶବ୍ବ ଥିଲା ଗୋଟି ଗୋଟି କରି

ଲେଖି ଦେଇଛି ସେ ପୃଷ୍ଠାରେ

ତଥାପି ଲାଗୁଛି ଅଧା ରହିଗଲା

ଆଉ ବୋଧେ କିଛି ହାତରେ।

ପାନ୍ଥଶାଳା ପରି ଅପେକ୍ଷାର ମଗ୍ନ

ଏବେ ହୋଇଲାଣି ଶେଷ

ଯେତେ ବି ଗୁଣିଲି ଫେଡିଲି ହରିଲି

ପାଇଲିନି ଭାଗଶେଷ ।

କେତେ ଦିନ ରାତି ସାରି ମୁଁ ଦେଇଛି

ଏଇ ତେପନ ପୃଷ୍ଠାରେ

ଅୟୁତ ଭାବନା ରଖିଥିଲି ଯାହା

ଆଜି ତାକୁ ମନ ଝୁରେ ।

ଜୀବନ ପୃଷ୍ଠାକୁ ସଜେଇଥିଲି ଯା

ନାଲି ନେଳି ମଲାଟରେ

ମୋ ଅଜାଣତେ ଚୋରାଇ ନେଲା କେ

ନିତି ତାକୁ ଝୁରି ମରେ ।

ଅନାବନା ଗାରେ ଗାରେଇ ଚାଲିଛି

ଏଇ ଜୀବନ ସ୍ୱାକ୍ଷର

ଗୋଟିଏ ସ୍ୱାକ୍ଷରେ ଯେଉଁ ତୃପ୍ତି ଅଛି

କୋଟିଏ ବା କି ଦରକାର ।

ଚାଲି ଚାଲି ପଥ ଥକିଲାଣି ପାଦ

ଏବେ ଲୋଡା ଟିକେ ଶାନ୍ତି

ଶୋଇବାକୁ ଇଛା ଚିର ନିଦ୍ରାରେ

ପାଇବାକୁ ଚାହେଁ ମୁକ୍ତି ।