ଜଗନ୍ନାଥ ତୁମେ
ଜଗନ୍ନାଥ ତୁମେ
ହେ ଜଗନ୍ନାଥ
ତୁମେ ଅଭୟ, ତୁମେ ଅକ୍ଷୟ,
ଶୂନ୍ୟରୁ ତୁମେ ଶତ ଶହସ୍ର,
ଵିନ୍ଦୁରୁ ସିନ୍ଧୁଯାଏ ତୁମ ଅସ୍ଥିତ୍ୱ I
ତୁମେ ଅନ୍ତ, ଅନନ୍ତ,
ବ୍ୟକ୍ତ ପୁଣି ଅବ୍ୟକ୍ତ,
ତୁମେ ସ୍ୱପ୍ନ, ବାସ୍ତବତା,
ଶବ୍ଦ ଆଉ ନୀରବତା,
ତୁମେ ସୁପ୍ତ ପୁଣି ସଦା ଜାଗ୍ରତ I
ହେ ଜଗନ୍ନାଥ
ତୁମେ ସମୟ, ସମୟାତୀତ,
ଅପ୍ରାପ୍ତି ରୁ ପ୍ରାପ୍ତି ଯାଏ,
ଶାନ୍ତିରୁ ମୁକ୍ତି ଯାଏ,
ତୁମେ ଅନନ୍ତ କୋଟି ପ୍ରୟାସ I
ତୁମେ ଗୀତା, ଭାଗବତ,
ତୁମେ ବେଦ, ଉପନିଷଦ,
କଦମ୍ବ ବନରେ ତୁମେ
ବିରହୀ ରାଧାର ଶ୍ୟାମ,
କୁଞ୍ଜ ବନରେ ଶୀତୁଆ ସଞ୍ଜରେ,
ତୁମେ ରାଇ ନୂପୁରର ଛାନ୍ଦ I
ବଂଶୀ ସ୍ୱରରେ,
ରାଧା ପ୍ରେମରେ,
ମୀରା ଭାବରେ,
ନୃତ୍ୟରତ ତୁମେ ରସିକ ନାଗର କୃଷ୍ଣ,
ନନ୍ଦର ନନ୍ଦନ,
ଯଶୋଦା ପ୍ରାଣଧନ,
ଭକ୍ତପ୍ରାଣ ଭଗବାନ,
ତୁମେ କୃପାସିନ୍ଧୁ ରାମ I
ସୀମାର ପରିସୀମାରୁ,
ଦୂର ଦିଗ୍ବଳୟରୁ,
ତୁମେ ଏକ ଉଦୀୟମାନ ଜହ୍ନ I
ହେ ଜଗନ୍ନାଥ
ନା ତୁମେ ବ୍ୟକ୍ତ, ଅବ୍ୟକ୍ତ,
ନା ତୁମେ ପକ୍ଵ, ପରିପକ୍ଵ,
ନା ଆଦି, ନା ଅନ୍ତ,
ତୁମେ ତ ବିସ୍ତୀର୍ଣ୍ଣ, ବିଶାଳ,
ଅନନ୍ତ ଆକାଶ,
ଦୀର୍ଘ ଏକ ପ୍ରାଚୀର I
କୋଟି ସିନ୍ଧୁର ମିଳନ ତୁମେ,
କୋଟି ପୁଣ୍ୟର ପ୍ରୟାଗ ତୁମେ,
ପୂର୍ଣ୍ଣତ୍ୱ ତୁମେ, ପୂର୍ଣ୍ଣ ଅବତାର ତୁମେ I