ଇଚ୍ଛା

ଭାରି ଇଚ୍ଛା ହୁଏ

 ତୁମ ହାତ ଲେଖା

   କବିତାଟେ ପଢିବାକୁ 

ଶବ୍ଦର ମାଧୁର୍ଯ୍ୟ

 ଭାବର ସୌନ୍ଦର୍ଯ୍ୟ

  ପ୍ରୀତି ରଙ୍ଗେ ଭିଜିବାକୁ 

ଦଗ୍ଧ ହୃଦୟର

  ଭାବ ସୁଧା ଧାରେ

   ନିମଗ୍ନରେ ହଜିବାକୁ 

ବିରହ ରାଗିଣୀ

  ବିନିଦ୍ରା ରଜନୀ

   କାବ୍ୟଞ୍ଜଳୀ ରଚିବାକୁ 

ଲେଖନ୍ତନି ଥରେ    

  ହୃଦୟର ବାର୍ତ୍ତା

   ହୃଦୟ ଯାଆନ୍ତା ବୁଝି 

ଶୂନ୍ୟତା ନିଦାଘେ

  ମନ ଉପବନ

  କେମିତି ଯାଇଛି ସିଝି 

ଲେଖନ୍ତ "ପ୍ରିୟା ଗୋ "

  ତୁମ ବିନା ଏଠି

   ଫଗୁଣଟା ବାସହୀନ 

କୋଇଲି କୁହୁରେ

  ନାହିଁ ସେ ଲାଳିତ୍ୟ

   ଝାଉଁଳିଛି ମଧୁବନ 

ସପନ ରୁଷିଛି

  ଅଭିମାନ କରି

   ନିଦ ନିରୁର୍ଦ୍ଦିଷ୍ଟ କାହିଁ 

ବିଦଗ୍ଧ ହୃଦୟ

 ଝୁରେ ବହୁ ଦୂରେ

   ବିରହର ଜ୍ୱାଳା ସହି 

ଫୁଲ ସିନା ଫୁଟେ

  ବାସନା ବି ଛୁଟେ

   ମହକି ପାରେନି ମନ 

ଅବୁଝା ନୟନ

 ହୃଦୟ ସ୍ପନ୍ଦନ

  ଅୟୁତ ତା ଅଭିମାନ 

ସକାଳରୁ ସଞ୍ଜ

  ଆଖି ଲମ୍ବି ଯାଏ

   ଚିଠି ଆସିବାର ବାଟେ 

ଦିନ ମାସ ବର୍ଷ

  ଯାଏ ସିନା ବିତି

   ଉଦାସୀ ବାଦଲ ଘୋଟେ