ହାରିବାର ଆନନ୍ଦ
ହାରିବାର ଆନନ୍ଦ
ଅହଙ୍କାର ହାରେ ଯେବେ ବିବେକ ଆଗରେ ,
ଘୃଣା ହାରିଯାଏ ଯେବେ ପ୍ରେମ ସମ୍ମୁଖରେ ,
ଯେବେ ସନ୍ଦେହ ହାରଇ ବିଶ୍ଵାସ ଆଗରେ ,
ସେ ହାରିବାର ଆନନ୍ଦ ନିଆରା ସତରେ !
ଯେବେ ଅଧର୍ମ ହାରଇ ଧର୍ମ ସମ୍ମୁଖରେ ,
ହିଂସା ହାରିଯାଏ ଯେବେ ଅହିଂସା ଆଗରେ ,
ଅଜ୍ଞାନତା ଯେବେ ହାରେ ଜ୍ଞାନ ସମ୍ମୁଖରେ ,
ସେ ହାରିବାର ଆନନ୍ଦ ନିଆରା ସତରେ !
ମୃତ୍ୟୁ ହାରିଯାଏ ଯେବେ ଜୀବନ ଆଗରେ ,
ଯେବେ ଲୁହ ହାରିଯାଏ ହସ ସମ୍ମୁଖରେ ,
ସ୍ଵାର୍ଥ ଯେବେ ହାରିଯାଏ ସମ୍ପର୍କ ଆଗରେ ,
ସେ ହାରିବାର ଆନନ୍ଦ ନିଆରା ସତରେ !
ଶତ୍ରୁତା ହାରଇ ଯେବେ ମିତ୍ରତା ଆଗରେ ,
ଭୋଗ ଯେବେ ହାରିଯାଏ ତ୍ୟାଗ ସମ୍ମୁଖରେ ,
ଯେବେ ଅନ୍ଧକାର ହାରେ ଆଲୋକ ଆଗରେ ,
ସେ ହାରିବାର ଆନନ୍ଦ ନିଆରା ସତରେ !
ଯେବେ ଭୟ ହାରେ ଧୈର୍ଯ୍ୟ ସାହସ ଆଗରେ ,
ଯୁଦ୍ଧ ହାରେ ଯେବେ ଶାନ୍ତି ମୈତ୍ରୀ ସମ୍ମୁଖରେ ,
ନିରାଶା ହାରଇ ଯେବେ ଭରସା ଆଗରେ ,
ସେ ହାରିବାର ଆନନ୍ଦ ନିଆରା ସତରେ !
ମିଥ୍ୟା ହାରିଯାଏ ଯେବେ ସତ୍ୟର ଆଗରେ ,
ଯେବେ ବନ୍ଧନ ହାରଇ ମୁକ୍ତି ସମ୍ମୁଖରେ ,
ଦେହ ଅଭିମାନ ଯେବେ ଆତ୍ମା ଆଗେ ହାରେ
ସେ ହାରିବାର ଆନନ୍ଦ ନିଆରା ସତରେ ।।