ଗୋଲାମ
ଗୋଲାମ
ପେଟ ଚାଖଣ୍ଡକ ପାଇଁ ହୁଏ ବିକ୍ରୀ
ନଥାଏ ସ୍ବତନ୍ତ୍ର ପରିଚୟ
ସ୍ବାଧୀନତା ହାରି ଉଠବସ ହୋଇ
ମୁନିବର ଗାଏ ଜୟ ଜୟ
ଏହା ହିଁ ଗୋଲାମଗିରି
ବନ୍ଦୀ ଜୀବନଟା ଅସହାୟେ କାଟେ
ସୁଖଦୁଃଖ ଅନୁସରି ।
ଯାହା ହିଁ ମୁନିବ କରଇ ହୁକୁମ
କରିବାକୁ ତା'କୁ ହୁଏ ବାଧ୍ୟ
ନପାରିଲେ ଗାଳି ବର୍ଷଣ ହୁଅଇ
ରୋକିବାକୁ ନାହିଁ କା'ର ସାଧ୍ୟ
ଆସୁ ପଛେ ଯେତେ ଦୁଃଖ
ଅନ୍ତର ବେଦନା କାହାକୁ ନକହି
ମନେ ମାରେ ମନଭୋକ ।
ବନ୍ଦୀ ଜୀବନରୁ ମୁକୁଳିବା ପାଇଁ
ଚେଷ୍ଟା ବି ତା'ର ହୁଏ ବିଫଳ
ଅର୍ଥ ସଙ୍କଟକୁ କେମିତି ଜୁଝିବ
ଖୋଜି ପାଏ ନାହିଁ କିଛି ବଳ
ସେ ଅସହାୟ ଭାବରେ
ଜୀବନ ଜୀବିକା ଉଭୟ ସାଉଁଟି
ଗୋଲାମୀକୁ ଆଶ୍ରା କରେ ।
ଆଘାତରେ ଲହୁଲୁହାଣ ହେଲେ ବି
କ୍ଷତକୁ କେହି ଦେଖନ୍ତି ନାହିଁ
ନିଜର ଯନ୍ତ୍ରଣା ନିଜେ ହିଁ ଲିଭାଇ
ଧାଇଁ ଯାଏ କରମେ ଆଗେଇ
ନିଜକୁ ଶାନ୍ତ୍ବନା ଦେଇ
ଗୋଲାମ ପରା ସେ ସୁଖକୁ ଖୋଜିବା
କେବେ ଭାଗ୍ୟେ ନ ଜୁଟଇ ।