ଏ କଲମ

ଏ କଲମ କେବେ ନିହାଣଟିଏ

ତୋ ରୂପ ସୌନ୍ଦର୍ଯ୍ୟର ମୂର୍ତ୍ତି ଗଢ଼େ,

ଏ କଲମ କେବେ ତରବାରୀ ଟିଏ

ଅନ୍ୟାୟ,ଅନୀତି ବିରୁଦ୍ଧରେ ଲଢ଼େ।

ଏ କଲମ କେବେ ମଲମଟିଏ

ହୃଦୟର ଗଭୀର କ୍ଷତ ଶୁଖାଏ,

ଏ କଲମ କେବେ ରଙ୍ଗ ତୂଳୀ ଟିଏ

ସବୁଜିମା ପ୍ରକୃତିର ଚିତ୍ର ଫୁଟାଏ।

ଏ କଲମ କେବେ ଶବ୍ଦର ଝରଟିଏ

ସଂସ୍କୃତି,ପରମ୍ପରାର ସଙ୍ଗୀତ ହୁଏ,

ଏ କଲମ କେବେ ବଇଁଶୀଟିଏ

ପ୍ରିୟା ପୀରତିରେ ପ୍ରେମଗୀତି ଗାଏ।

 

ଏ କଲମ କେବେ ବ୍ୟଙ୍ଗ ପେଡ଼ିଟିଏ

କାହା ଅଧର ଧାରେ ଫୁଟାଏ ହସ,

ଏ କଲମ କେବେ ଆଜୀବନ ସାଥୀ

ଲେଖିଯାଏ କାହା ଜୀବନ ଇତିହାସ।